JONAS MKUDE AWEKWA CHINI YA UANGALIZI WA MADAKTARI

JONAS Mkude, kiungo mshambuliaji wa Simba amewekwa kwenye uangalizi maalumu wa jopo la madaktari kwa ajili ya kumfanyia uchunguzi wa jeraha lake la mguu alilopata jana, Juni 8 kwenye mchezo wa kirafiki dhidi ya KMC.

Mkude aliumia kipindi cha pili kwenye harakati za kugombea mpira baada ya kugongana na wachezaji wa KMC, Uwanja wa Simba Mo Arena ambapo Simba ilishinda mabao 3-1.

Mabao mawili ya Simba yalifungwa na John Bocco ambaye ni nahodha dakika ya 34 na 75 huku lile la tatu likifungwa na Ibrahim Ajibu dakika ya 88 na lile la KMC likifungwa na Charles Ilanfya dakika ya 30.

Meneja wa Simba, Patrick Rweyemamu amesema kuwa kwa sasa Mkude yupo kwenye uangalizi wa jopo la madaktari wakimfanyia uchunguzi wa tatizo lake alilolipata kwenye mguu ukikamilika ripoti yake itatolewa.

"Kwa sasa Mkude yupo chini ya uangalizi wa madaktari ambao wanatazama tatizo lake lipo wapi, uchunguzi ukikamilika ripoti itatolewa," amesema.