KINACHOCHELEWESHA SUREBOY KUSEPA AZAM NA KUANZA MAISHA MAPYA YANGA NI HIKI

 

UONGOZI wa Azam FC umeweka bayana kuwa kinachochelewesha dili la kiungo Salum Abubakar kumalizana na Yanga ni suala la dau ambalo Yanga wamelitoa kwa Azam FC.

Habari zinaeleza kuwa Yanga wanahitaji saini ya Sureboy ili awe mbadala wa Papy Tshishimbi aliyeachwa mazima ndani ya kikosi hicho ila walipeleka dau la milioni 20 kwa Azam FC jambo lililochelewesha kiungo huyo kuibukia Azam FC.

“Sureboy ana mkataba wa mwaka mmoja na Azam FC, yeye mwenyewe amesema anahitaji changamoto mpya ila dau walilopeleka Yanga kwa Azam FC ni milioni 20 jambo ambalo limechelewesha dili la kiungo huyo,” ilieleza taarifa hiyo.

Abdulkarim Amin, Mtendaji Mkuu wa Azam FC amesema kuwa wamepokea ofa kutoka kwa Yanga ambao wameonesha nia ya kumtaka kiungo huyo watawajibu mapema ili kufanya nao biashara.

“Barua ya mwanzo walikuwa wanauliza kama wanaweza kumpata mchezaji huyo tukawajibu kuwa bado ana mkataba wa mwaka mmoja, Agosti 6 walileta rasmi barua ya kuomba kumpata mchezaji wetu jambo ambalo tunalifanyia kazi ili tufanye nao biashara.

“Tukipata bei ambayo ni sahihi kwetu tunamruhusu kwa kuwa mchezaji mwenyewe ameonyesha nia kutaka kuondoka. Ikumbukwe kuwa wakati ule walipokuwa wakimhitaji Nchimbi, ofa ya kwanza ilikuwa ndogo baadaye wakaongeza ofa tukamuuza mpaka sasa wapo naye hata kwa huyu pia hatuwezi kushindwana,” amesema.