SAKATA LA HERY SASII LINAFIKIRISHA KWELI

 

LABDA ndilo jina lililotamkwa zaidi wiki hii. Hery Sasii. Muamuzi aliyewapa Simba penalti isiyokuwa ya halali, ikafungwa na mshambuliaji wao hatari Meddie Kagere.

Ilikuwa katika mchezo wa Ligi Kuu Tanzania Bara dhidi ya KMC. Wakati Simba wanashambulia mpira ulimgonga mshambuliaji wa KMC Hassan Kabunda ‘Ninja’ katika eneo la tumbo, muamuzi akatafsiri kuwa Kabunda ameunawa mpira. Akatenga tuta.

Sijui Sasi aliona vipi kuwa mpira umegusa mkono. Wakati mpira unapigwa na beki wa KMC kabla haujatua kwenye tumbo la Kabunda, mikono ya Hassan Kabunda ilikuwa juu. Mikono ya Kabunda ilishuka chini wakati anaosha mpira kuuondoa kwenye eneo la hatari.

 Muda wote huu wakati tukio linatokea Sasii alikuwa nyuma ya mgongo wa Kabunda. Aliona vipi kuwa mpira umegusa mkono? Anajua mwenyewe.

Kinacho muhukumu zaidi Sasii ni kuwa, penalti aliyotoa ndiyo imeamua mchezo. Ingekuwa rahisi sana kwa ‘watu kupotezea’ kama Simba wangefunga bao lingine na kushinda mbili kwa sifuri au kama KMC ingesawazisha na kupata bao lingine la ushindi.

 

 Watanzania huwa hawajali sana  matukio yasiyobadilisha matokeo. Utasikia mtu akikuambia, hata lile tuta lisingetolewa bado tungeshinda kwasababu tulifunga mabao mengine matatu. Hatuna tabia ya kufiri na kujali athari ya baadhi ya vitu vinavyotuangusha maishani. Tunapenda kujitetea kwa hoja nyepesi. Sisi bwana!

Hili la Sasii ni muendelezo wa sinema zinazoendelea kuchezwa na waamuzi wa Kitanzania katika ligi za Tanzania. Sasi huyu-huyu amewahi kuharibu mechi ya Yanga na Azam pale kwa Mkapa. 

Mechi ambayo ingeweza kuisha kwa mabao matatu kwa moja ikamalizika kwa sare tasa. Siku hiyo Sasii aliwanyima Azam mabao mawili ya halali na penalti moja kisha akawanyima yanga penalti baada ya David Molinga kukwatuliwa na Wadada katika box la azam.

Wahanga wa juzi KMC, walikuwa wahanga tena wa uamuzi mbovu walipocheza dhidi Yanga kule Mwanza. Yanga walipewa penalti isiyo halali iliyofungwa na ‘mkongomani’ Tuisila Kisinda. Yanga haohao walifaidika na maamuzi mabovu ya mwamuzi walipocheza na Gwambina kule Misungwi. Gwambina wakanyimwa bao la halali kabisa. Hukohuko kanda ya ziwa, Azam walinufaika na maamuzi mabovu ya muamuzi dhidi ya Biashara. Muamuzi akakubali bao la ‘offside’ la Ayoub Lyanga.

Haya ni matukio machache tu ninayoyakumbuka yaliyotokea katika mechi ya hizi timu tatu kubwa. Vipi kwa timu ndogo? Vipi kwa matukio ambayo siyakumbuki? Hali ya waamuzi wetu ni mbaya sana. Nini kinawakumba?

Ni swali gumu sana kulijibu ukizingatia upo nje ya fani ya uamuzi. Kutoa maoni tu inatosha. Kwanza nina wasiwasi na ukufunzi wanaofanyiwa waamuzi wetu. Haiwezekani kila siku muamuzi mmoja atende makosa yaleyale.

Haiwezekani kila siku waamuzi tofauti warudie makosa yanayofanana. Tunakubali ubinadamu upo, lakini ubinadamu gani huu wa kila siku? Makosa mengi yanatokana na uzembe tunaosingizia ni ubinadamu. Uzembe unaotokana na maandalizi mabovu.

Bado siamini kama kuna marefa wanaokubali kuhongwa katika karne ya 21. Kama watanzania zaidi ya milioni 3 wanaangalia mpira kwenye televisheni, hakuna jinsi unaweza kuwadanganya. Lazima utaumbuka tu. Bado imani yangu inaniambia marefa wetu hawajui sana wanachokifanya ndiyo maana wanakosea sana. Hoja ya kuhongwa hainiingii sana.

Mwisho kabisa tuwaelewe wenzetu walioamua kuingiza teknolojia ifanye kazi kwenye soka. Pengine huu mjadala wote usingekuwepo kama siku ile pale kwa Mkapa kungekuwa na ‘VAR’. Muamuzi angeenda tu pembeni kutazama na kupindua maamuzi yake. Sasa tuelewe kwanini wazungu wameamua kutumia mashine.