HILI HAPA BALAA LA REKODI ZA JEMBE JIPYA AZAM

 

BAADA ya Azam kukamilisha usajili wa mlinda mlango raia wa Uganda, Mathias Kigonya, unaweza kusema ‘Wanalambalamba’ hao wamepata jembe kutokana na rekodi za hatari alizonazo nyota huyo.

Kigonya amesaini mkataba wa miaka miwili kuichezea Azam, amewahi kucheza kwa mafanikio ndani ya Sofapaka na Kakamega za Kenya, Bright Star ya Uganda na Forest Rangers alipocheza msimu uliopita.

Ametwaa tuzo ya Kipa Bora wa msimu mara mbili mfululizo wa Ligi Kuu Zambia, msimu wa 2019 (ligi ndogo) na 2019/2020.

Akiwa na kikosi cha Sofapaka ya Kenya kwa miaka mitatu tangu 2016, Kigonya  alifanikiwa kutajwa katika tatu bora ya makipa wa ligi ya Kenya.

Msimu uliopita, hakuruhusu wavu wake kuguswa (clean sheet) kwenye mechi 14 kati ya 23 alizoichezea Rangers na msimu huu amekusanya nne katika mechi 10 alizocheza hadi anatua Azam FC.

Mlinda mlango huyo ambaye pia yumo kwenye kikosi cha timu ya Taifa ya Uganda 'The Cranes', amekuwa na mchango mkubwa akiwa na Forest Rangers, baada ya kusimama vema akiwa katika milingoti mitatu langoni.