KOCHA AS VITA BADO ANAWEWESEKA NA KIPIGO CHA SIMBA

KOCHA mkuu wa klabu ya AS Vita ya DR Congo, Frolent Ibenge amesema kuwa bado anaukumbuka vizuri mchezo wa kipigo cha mabao 2-1 walichokipata dhidi ya Simba kwenye hatua ya Makundi msimu wa 2018/19.

Mchezo huo ulikuwa wa mwisho kwa timu hizo mbili zilizokuwa zimewekwa kwenye kundi D, pamoja na Al Ahly na JS Saoura ambapo ushindi huo uliwapa Simba tiketi ya kufuzu hatua ya robo fainali ya michuano hiyo mikubwa kwa ngazi ya klabu Afrika.

Simba iliyokuwa ya kwanza kufungwa bao kupitia kwa nyota wa AS Vita, Kazadi Kasengu ilijipatia mabao yake kupitia kwa Mohammed Hussein na Clatous Chama.

Simba imepangwa tena na AS Vita msimu huu kwenye kundi A, la Ligi ya mabingwa pamoja na Al Ahly pamoja na Al Merrikh ya Sudani.

Akizungumzia kuhusu mchezo huo Ibenge alisema: "Moja ya mechi ambazo siwezi kuzisahau nikiwa katika ardhi ya Tanzania ni ile ya kipigo cha mabao 2-1 dhidi ya Simba nikiwa na AS Vita katika michezo ya hatua ya makundi msimu wa 2018/19.

"Malengo yetu kwenye mchezo ule ilikuwa kupata ushindi, lakini tulijikuta tunapoteza na Simba wakatinga hatua ya robo fainali, msimu huu tutakutana nao tena na najua haitakuwa rahisi na nilazima tujipange mapema,"