WANAYANGA KWA HILI MMETISHA AISEE

Jumapili iliyopita ndani ya ukumbi wa DYCC Chang’ombe Dar es Salaam, tukio jingine la historia nzuri liliandikwa kwa sauti moja kubwa ya Wanachama wa klabu ya Yanga baada ya kuupitisha mchakato wa mabadiliko wa klabu hiyo.

 

Hatua hii ni kubwa sana katika historia ya klabu ya Yanga tangu kuanzishwa kwake mwaka 1935, na bila shaka hatua hii inawasogeza zaidi katika ile Yanga ya ahadi iliyoanza kufikiriwa katika kikao cha mkutano mkuu wa wanachama wa klabu hiyo uliofanyika Agosti 6, mwaka 2016.

 

Katika kikao hicho ambacho kilifanyika miaka mitano na miezi 10, iliyopita ndipo kwa mara ya kwanza lilikuja wazo la kukodishwa kwa klabu ya Yanga kwa kipindi cha miaka 10 kwa kampuni ya Yanga Yetu iliyokuwa chini ya aliyekuwa Mwenyekiti wa klabu hiyo, Yusuf Manji.

 

Najua haikuwa safari rahisi kwa Yanga mpaka kufikia hatua hii, kwani wamefanikiwa kuruka vikwazo vingi ili kuwa hapa walipo sasa, kuna watu ambao waliwakatisha tamaa, kuwacheka na hata kusimama njiani ili kuwazuia, lakini bado walipambana mpaka tone la mwisho la jasho kufika hapa.

 

Pongezi za pekee ziwaendee Mwenyekiti wa Yanga, Daktari Mshindo Msolla kwa kupitisha maadhimio ya mchakato huu, lakini pia Uongozi wa kampuni ya GSM ambao ni wadhamini wa klabu ya Yanga kwa kutoa kiasi kikubwa cha fedha kudhamini mchakato wote.

 

GSM walileta wataalamu kutoka kampuni ya La Liga ya nchini Hispania, ambayo imehusika kwa kiasi kikubwa katika uandaaji wa rasimu ya mabadiliko ya mfumo na ile ya kikatiba katika kufanikisha mchakato huu.

 

Kilichobaki kwa sasa ni kuhakikisha Uongozi unakuwa na mpango mkakati thabiti wa kuhakikisha rasimu iliyopendekezwa inawekwa katika utekelezaji wa kila siku ‘Operational Planning’ ili kufanikisha, na kuukamilisha mchakato huu kwa muda uliopangwa.

 

Yanga inakuwa klabu ya pili hapa nchini kuuendea mchakato wa uendeshaji wa klabu kisasa, ambapo tayari wapinzani wao wa jadi Simba tayari wamelifikisha suala hilo kwenye meza ya Tume ya ushindani wa Biashara (FCC).

 

Mpira wa sasa ni biashara kubwa duniani, na ili kuendana na ushindani wa soko la dunia ni wazi klabu zetu zinapaswa kufanya mabadiliko ua kimfumo, na kutoa mianya kwa wawekezaji wengi zaidi kujitokeza kuwekeza ndani ya klabu hizi.

 

Uwekezaji huu utazidi kuzipa klabu zetu misuli ya kuweza kufanya usajili wa wachezaji bora zaidi, kuwatunza wachezaji hao katika mazingira bora, na hata kutoa stahiki nono kama ambavyo klabu nyingine zilizo katika nchi ziilizoendelea kisoka zinavyofanya.

 

Kwa hili Wanayanga mmtesha sana, na si dhambi klabu nyingine kuiga haya ili kuzidi kukuza thamani ya ligi yetu.