MAKALA: VIGOGO VIWILI VINAVYOGUSWA NA TUHUMA ZA NSA JOB

Na Saleh Ally

SHIRIKISHO la Soka Tanzania (TFF), limetangaza kumtaka mshambuliaji wa Coastal Union, Nsa Job kuwasilisha ushahidi mara moja kuhusiana na mtu aliyemtaja kwamba alimhonga ili asifunge.

Aprili 3, mwaka huu, Nsa alikaririwa na kituo kimoja cha redio akisema aliwahi kuhongwa na kiongozi mmoja wa klabu kigogo cha soka nchini ili asiifunge timu yake watakapocheza dhidi yake, akampa fungu la fedha, naye akapokea halafu bado siku ya mchezo akapachika bao.

Awali ilikuwa ikiaminika kwamba Nsa alipokea fedha hizo wakati akiwa anaichezea Coastal Union, lakini kwa takwimu kama ni msimu huu, Nsa hajaifunga timu yoyote ambayo ni kigogo.

Kigogo, maana yake kongwe au kubwa kifedha na umaarufu. Katika Ligi Kuu Bara, zinazoingia kwenye kundi hilo ni timu nne tu, Yanga, Simba, Azam FC na Mtibwa Sugar.

Nsa alicheza mzunguko wa kwanza tu, akaumia mechi ya mwisho dhidi ya Ruvu JKT na ameukosa mzunguko wote wa pili. Katika mechi za mzunguko wa kwanza dhidi ya Simba, ilikuwa sare ya bila kufungana, walipocheza na Azam, timu yao ikalala kwa mabao 4-1, bao lao la kufutia machozi likafungwa na kiungo Jerry Santo.

Dhidi ya Yanga, vijana hao wa Tanga walifungwa mabao 2-0, yaliyofungwa na Didier Kavumbagu na Hamis Kiiza. Walipowavaa Mtibwa, Coastal walishinda mabao 3-0 yakiwa yamefungwa na Juma Jabu, Gerald Lukindo na Daniel Lyanga.

Kwa takwimu hizo, maana yake msimu huu, Nsa hakuwa ameifunga timu yoyote kigogo, maana yake tunalazimika kurudi na kuangalia msimu uliopita aliokuwa akiichezea Villa Squad.

Msimu uliopita, takwimu zinaonyesha Nsa alimaliza akiwa na mabao 12 akiwa nafasi ya pili ya upachikaji mabao akiwa na Villa Squad ambayo iliteremka daraja.

Hesabu zinaonyesha katika mabao yake 12 ya msimu uliopita, timu kigogo aliyoifunga katika mizunguko yote miwili akiwa na Villa Squad ni Simba katika mechi iliyopigwa Februari 4, 2012, bao lake pekee ndiyo liliiangusha Simba siku hiyo kwa ushindi wa 1-0.

Lakini Machi 17, 2012, Mtibwa Sugar iliichapa Villa kwa mabao 2-1 na hilo la kufutia ‘machozi’ likapachikwa kimiani na Nsa.

Maana yake Nsa hajaifunga Azam FC wala Yanga msimu huu na uliopita, lakini uliopita ameifunga Mtibwa na Simba na ndiko anakoelekeza lawama zake kama ni kati ya misimu hii miwili.

Kama itakuwa hivyo, maana yake timu mbili ndiyo zinaingia katika tuhuma hizo za Nsa ambazo tayari TFF imemtaka azifafanue kwao kwa kuwaeleza ni kiongozi yupi aliyefanya hivyo la sivyo adhabu itamkuta mchezaji huyo.

Rushwa limekuwa tatizo kubwa sana katika soka nchini, ingawa ni kitu kigumu kugundulika kutokana na kufanyika kwa siri sana. Lakini Nsa ameamua kuweka hadharani, huenda ni wakati mzuri kwa TFF kutoa mfano iwe kwa kiongozi fulani au mtu mwingine.

Mechi za vigogo (Yanga, Simba, Azam, Mtibwa Sugar) msimu wa 2011-12 alizocheza Nsa akiwa na Villa:

MZUNGUKO WA KWANZA:

Septemba 7, 2011

 Simba 1-0 Villa

Gervais Kago 7

Septemba 13, 2011

 Villa 0–2 Azam              

                     Tchetche 1

                      Bocco 35

Septemba 17, 2011

Villa 0-2 Mtibwa

                       Thomas Morris 13

                        Said Rashid     47

Septemba 21, 2011

Yanga 3-2 Villa

Niyonzima 19     Kijuso         11

Asamoah   27     Kigi Luseke   72

Kiiza         63

MZUNGUKO WA PILI:

Februari 4, 2012 

Villa 1-0 Simba

Nsa Job 40

Februari 15, 2012

Azam          4-1   Villa

Salum Abubakar       Nsa Job 22

Abdi Kassim 28

Hamis Mcha 43

Kipre Tchetche 45

Februari 19, 2012

Mtibwa               2-1              Villa

Vincent Barnabas 19   Nsa Job 32

Said Bahanuzi

Machi 17, 2012

 Villa 0-1 Yanga

                 Kiiza 90