EXCLUSIVE: LIEWIG ASEMA HATAMBUI KUACHISHWA KAZI, AKIMALIZA MAPUMZIKO ANAREJEA DAR

Liewig akiwa na Julio

Kocha Mkuu wa Simba, Patrick Liewig amesema hana taarifa za kutimuliwa katika klabu hiyo.
Amesema anatarajia kurejea nchini mwezi ujao ili kuanza maandalizi ya kuinoa timu hiyo.
Akizungumza moja kwa moja kutoka Ufaransa, Liewig amesema bado ana mkataba Simba na hajui lolote kuhusu kuachishwa kazi.

“Sijui lolote, nimeona kwenye vyombo vya habari kupitia mtandao, lakini sioni kama kuna sababu ya kuuliza.

“Taratibu za kazi zinajulikana, mimi ni mwajiriwa na sipaswi kuhoji mambo mengi. Kama huo utakuwa uamuzi wao, basi kuna taratibu za kufuata,” alisema akiwa nchini Ufaransa.

Liewigi amesema yuko mapumzikoni, hivyo atawasiliana na uongozi wa Simba baada ya siku chache ili kupata uhakika.

Tayari Simba imefikia makubaliano na Abdallah Kibadeni ambaye alikuwa Kocha wa Kagera Sugar.

Liewig alichukua nafasi ya Milovan Cirkovic lakini ameonekana kufeli zaidi baada ya timu hiyo kushika nafasi ya tatu katika ligi kuu.

Hata hivyo, uongozi wa Simba kupitia Kaimu Makamu Mwenyekiti, Joseph Itang’are ‘Mzee Kinesi’, imesema haimhitaji tena Mfaransa huyo.