HII SI MARA YA KWANZA STARS KUKABIDHIWA SUTI

Baada ya kikosi cha timu ya taifa, Taifa Stars kukabidhiwa vazi la suti na wadhamini kinywaji cha bia ya Kilimanjaro, limeonekana kama jambo jipya.

Lakini hii si mara ya kwanza kwa Stars kukabidhiwa suti, ingawa ninaweza kusema zilizotolewa safari hii ziko katika kiwango kinachovutia zaidi.

 Mwaka 2009 nilisafiri na Stars kwenda Ivory Coast ambako kulikuwa na michuano ya Kombe la Chan iliyofanyika nchini Ivory Coast.

 

Stars walikabidhiwa suti na Serengeti waliokuwa wadhamini wakati huo na wachezaji walitilia viwalo na kupendeza kwelikweli.

Ulionekana ni mfano mzuri na kwamba walikuwa wanakwenda kimataifa zaidi na mambo yangebadilika zaidi.

Lakini baada ya kurejea kutoka Chan, sikuwahi tena kuiona Stars ikisafiri ikiwa imevaa suti hizo.

Badala yake walirudi katika mtindo wa ‘trak suti’, nikajua ilikuwa ni kubadilisha mazingira, hadi leo kimya.

Nimeandika makala haya, lengo likiwa ni kuwakumbusha TFF ambao ndiyo walezi na wanaohangaika na timu hiyo vizuri zaidi kwamba wanapaswa kupambana na kuhakikisha suti hizo zinaendelea kuwepo.

Ni vazi la heshima la kikosi, hivyo wanapaswa kuwa nalo kwa kipindi kirefu kwa kuwa bado timu yetu inasafiri.

 

Wadhamini wameonyesha wanajali, walichofanya ni kitu kikubwa, hivyo kama nazo zitayeyuka baada ya muda mfypi halitakuwa jambo zuri.

 Ninaamini suti hizo hazitakuwa zimetolewa mara moja tu, lakini kwa wachezaji bila ya kujali watakuwa na uhakika wa kubaki katika kikosi cha Stars au hawatakuwepo, basi wanapaswa kuzitunza pia.

 

Jezi mnaweza kubadilishana, kwa kuwa ndiyo mfumo wa kisasa katika soka. Lakini haiwezekani kubadilishana suti hizo.

Ndiyo maana nasisitiza vema zikatunzwa ili kuendelea kuifanya Stars ikiwa katika mfumo tofauti na kuongeza mvuto kwa wadau wa soka nchini.