FC KILIMANJARO YA SWEDEN KUKIPIGA LEO

Timu ya Kilimanjaro FC ya Sweden, mchana huu inashuka dimbani mjini Stockholm kukipiga na Blue Hill IF katika mechi ya kirafiki inayosubiriwa kwa hamu kubwa.

Kilimanjaro FC inayoundwa na Watanzania wanaoishi nchini humo imekuwa tishio kwa timu mbalimbali inazokutana nazo.

Asilimia kubwa ya Watanzania wanaoishi nchini humo wamekifanya kikosi hicho kuwa moto wa kuotea mbali.

Mmoja wa viongozi wa Kilimanjaro FC, Nyupi Mwakikosa amesema mechi hiyo ni sehemu ya kuimarisha kikosi lakini kuwapa mawakala kadhaa kuwaona wachezaji wao.

“Tunaendelea kucheza mechi nyingi za kirafiki ili kuimarisha zaidi kikosi chetu kwa kuwa tunaweza kushiriki ligi za juu kidogo msimu ujao.

“Lakini tunawapa nafasi mawakala mbalimbali kuwaona wachezaji wetu hapa, huenda wengine wakapata timu,” alisema Nyupi.

Raia wengine kutoka katika nchi za Afrika nao wameunda vikosi vyao lakini Kilimanjaro FC imekuwa ‘tatizo’ kwao kutokana na kutoa vipigo karibu kila inapokutana nao.