WACHEZAJI SIMBA WAMPA UPWEKE KOCHA LIEWIG

Kocha wa zamani wa Simba, Patrick Liewig amesema anajisikia mpweke hasa unapofika wakati wa jioni.

Liewig raia wa Ufaransa amesema anatamani angekuwa kazini akijumuika na wachezaji wa Simba ambao alikuwa na mipango mingi.

“Wakati mwingine najikutaka nataka kutoa machozi, natamani kwenda mazoezini lakini naona si sahihi kufanya hivyo.

“Natamani kuwaona vijana wangu ambao wengi niliwaandaa na nilijua msimu mpya ningefanya nao mambo mengine makubwa zaidi kwa kuwa msimu uliopita ndiyo tulikuwa tumeanza kufanya kazi pamoja.

“Lakini haitawezekana tena, haya ndiyo maisha ya mpira, hivyo nitakuwa nikiwasubiri Simba wanilipe ili niondoke mapema. Najisikia vibaya kuendelea kukaa hapa,” alisema.

Tayari Simba imeshathibitisha kwamba kocha huyo atalipwa ndani ya siku chache kitita cha dola 26,000.

Hata hivyo, kumekuwa na mkanganyiko, kwani pamoja na Rage kukubali ni dola 26,000, katibu wake Evodius Mtawala amesema kocha huyo anadai dola 20,000 tu na si vinginevyo.