KIM AIZUNGUMZIA MECHI YA IVORY COAST, KIPI WALIKOSEA NA NINI CHA KUFANYA

*Alonga kuhusu Nyoni, refa pia kuhusu Yaya Toure, Gervinho

*Akubali makala ya Championi Jumatano kuhusu ukabaji

Na Saleh Ally

KOCHA Mkuu wa Taifa Stars, Kim Poulsen, amekubali kuwa kuna makosa kadhaa walifanya katika mechi yao dhidi ya Ivory Coast na kusababisha kupoteza mechi hiyo.

Stars ilifungwa mabao 4-2 na wageni wao Ivory Coast katika mechi iliyopigwa kwenye Uwanja wa Taifa jijini Dar es Salaam, Jumapili iliyopita na kutoka katika mbio za kuwania kucheza Kombe la Dunia 2014 nchini Brazil.

 

Kim Poulsen akijadili na Saleh Ally wakati wa mahojiano..

Katika mahojiano maalum yaliyofanyika Masaki jijini Dar, Kim, raia wa Denmark, alisema walikosea mambo kadhaa katika ukabaji ambayo yaliwaadhibu kwa kuwa walikuwa wakicheza dhidi ya wachezaji wenye kiwango bora zaidi duniani kisoka.

Pamoja na hivyo, Poulsen alikubaliana na makala ya uchambuzi kwa kutumia picha iliyoandikwa na Gazeti la Championi Jumatano kuhusiana na kutokuwa makini na kutowakaba ipasavyo washambuliaji wa Ivory Coast wakati Stars inashambuliwa.

Salehjembe: Safu ya ulinzi ilikuwa na matatizo makubwa, utaona picha zinaonyesha kiasi gani mabeki wetu walivyokuwa wakisimama mbali na washambuliaji wao wakati kwenye lango lao mabeki wao walikaba kwelikweli hata kama fowadi wetu hana mpira, hilo vipi?

Kim: Kweli, makosa yalikuwepo na tumeyaona wote. Kabla tulijadili lakini mwisho inawezekana hatukufanya kila tulichotaka kufanya, lakini hakuna wa kulaumiwa kwa kuwa tumeharibu wote kama timu.

Salehjembe: Makosa unaweza kuyafafanua zaidi?

Kim: Ndiyo, utaona hatukuwa karibu na wachezaji kama ulivyosema lakini tuliwapa nafasi kubwa zaidi wakati wanatushambulia. Tulikumbushana lakini bado hatukuweza kumaliza tatizo.

Kikubwa cha kujua tulicheza na wachezaji wa kiwango cha juu zaidi duniani, ukikosea, ujue umeumia.

Salehjembe: Kivipi?

Kim: Mfano angalia, sisi tulipata faulo zaidi ya nne karibu na lango lao, tumepiga na kukosa zote. Wao wakapata mbili, moja iliyopigwa na Yaya Toure wakafunga.

Hii inaonyesha kiasi gani wako makini zaidi. Ndiyo maana nasema hata kama tumepoteza lakini hapa kuna suala kubwa la kujifunza.

Salehjembe: Vipi kuhusiana na Erasto Nyoni, ilionekana kama ameshindwa kumdhibiti Gervinho?

Kim: Inawezekana, kuna matatizo yalikuwepo, lakini bado hatuwezi kumuangushia Nyoni mzigo wote, utaona kuna mambo (Nadir Haroub) Cannavaro na (Kelvin) Yondani walikosea, lakini kuna wakati viungo pia walikosea na kusababisha makosa kwa mabeki.

Washambuliaji pia walishindwa kutumia nafasi au kutulia. Ndiyo maana nasema hili ni kosa la timu na tunachotakiwa sasa ni kujifunza na kuendeleza nguvu mbele. Kumbuka tumecheza na timu namba moja kwa ubora wa soka barani Afrika.

Salehjembe: Huenda Nyoni alikuwa na hofu pia? Maana naona kama bao la nne alionyesha kumhofia kabisa Gervinho wakati ana mpira!

Kim: Naungana nawe, huenda ilikuwa hivyo, baada ya kusababisha penalti huenda aliingia woga, mbaya zaidi mashabiki walimzomea, hakikuwa kitu kizuri. Nitakachofanya nitakaa naye na kuzungumza vizuri.

Nitakupa mfano, katika kikosi changu kwa mara ya kwanza Ulimwengu alianza katika mechi ya Morocco tukiwa ugenini na hakunifurahisha. Baada ya mechi nilikaa naye, tukazungumza na kumueleza makosa yake na dhidi ya Ivory Coast nikampa nafasi tena ya kuanza, si unaona amefanya vizuri. Hii ndiyo inatakiwa badala ya kumsakama mchezaji na kummaliza kabisa.

Salehjembe: Unaizungumziaje penalti?

Kim: Ninaweza kupishana na kila mtu, lakini haikuwa penalti. Kweli Nyoni alimgusa Gervinho lakini si kwa kiwango cha kumuangusha, naye alijiangusha na wote tuliona. Ila naamini udogo wetu, mataifa makubwa yanapendelewa ndiyo maana tukafanyiwa vile. Mbona sikukataa penalti dhidi ya Morocco ingawa nako haikuwa sawa Aggrey (Morris) kupewa kadi nyekundu!

Salehjembe: Unafikiri itafika siku tutakuwa tishio kwa timu kama Ivory Coast?

Kim: Inawezekana kabisa, lakini tunahitaji muda kwa kuwa tunajifunza. Wao wamejifunza mengi, ndiyo maana unapocheza dhidi ya wachezaji kama Yaya, Gervinho na Salmon Kalou lazima uwe makini zaidi kuepuka makosa, maana ukifanya kosa tu, umeumia.

Salehjembe: Nini unataka kufanya katika kikosi chako ili kiwe bora zaidi?

Kim: Kupunguza makosa, hauwezi kuwa bora bila kupunguza makosa kwa asilimia kubwa. Kama ulifanya kumi, vizuri ukapunguza, yakifika mawili au matatu, basi utakuwa bora.

Salehjembe: Nini kinafuata baada ya hapo?

Kim: Ni kufuzu kucheza michuano ya Chan, lazima tupite ili kwenda kupata mambo mapya kama kujiamini na uzoefu zaidi. Hivyo ni lazima tuishinde Uganda katika mechi zote mbili.

Salehjembe: Bado kuna ugumu, mechi ya kwanza dhidi ya Uganda utaanzia Dar?

Kim: Kweli, nilipenda tuanzie kwao, lakini ukiwa bora, unaweza kupata matokeo mazuri Dar na baadaye kwao. Hivyo lazima tujiandae vizuri katika mechi ya kwanza.

Salehjembe: Unafanya nini kuwarudisha wachezaji wako katika hali ya kawaida kabla ya mechi ya Uganda, kwani huenda wameathirika kisaikolojia na mechi dhidi ya Ivory Coast?

Kim: Kweli inawezekana, maana walilia sana, hawakupenda yale matokeo. Niliwaambia kushangilia na kusikitika mwisho ni saa 24 baada ya hapo unaanza kitu kipya.

Nitakaa nao kama timu lakini nitazungumza na mchezaji mmojammoja ili kuwasisitiza kwamba tuna jukumu zito mbele yetu na Watanzania wanatutegemea, hivyo lazima tuishinde Uganda na kuvuka.

Salehjembe: Hautakuwa na Samatta, Ulimwengu na huenda John Bocco pia. Hauna mpango wa kuita mshambuliaji mwingine?

Kim: Nitasubiri kuhusu Bocco, lakini bado nimeanza kufanya kitu mapema kama kujiandaa. Nitambadili Chanongo kutoka kiungo hadi mshambuliaji, ninaamini bado anajifunza lakini baadaye atakuwa bora na inawezekana.

SOURCE; CHAMPIONI