KUTANA NA BOSI WA GERVINHO ANAYETAKA MABADILIKO SIMBA, YANGA

Na Saleh Ally

MIAKA imesonga mbele, mwaka 2009 nikiwa nchini Ivory Coast nilikutana na Aziz Alibhai, raia wa nchi hiyo mwenye asili ya Tanzania aliyeniambia anavyotamani kufanya kazi na klabu za hapa nyumbani.

Nilitembelea katika shule yake ya soka inayojulikana kwa jina la Ivoire Academie ambayo wachezaji kadhaa waliopita hapo akiwemo Gervais Lombe Yao maarufu kama Gervinho wanacheza soka la kulipwa barani Ulaya.

Alibhai alizaliwa jijini Dar es Salaam mwanzoni mwa miaka ya 1950, baadaye familia yake ikahamia nchini Ivory Coast ambako ndiyo yaliko maisha yake huku akiendelea na biashara mbalimbali.

Bilionea huyo alikuwa nchini wiki iliyopita akiongozana na kikosi cha Ivory Coast akiwa kati ya wajumbe wa kamati ya kuhakikisha timu hiyo inafuzu kwenda kucheza Kombe la Dunia nchini Brazil 2004.

 

Alibhai akiwa na Saleh Ally baada ya mahojiano jijini Dar

Alibhai anamiliki magari maalum ya kutengeneza barabara zaidi ya 50 kupitia kampuni yake ya Civil Works &Renting Equipment. Kampuni hiyo ina malori zaidi ya 80 ambayo imekuwa ikiyatumia kwa kazi zake pamoja na kukodisha.

Anamiliki ndege mbili binafsi, moja imekuwa ikiendeshwa na binti yake, pia ana uwanja wake binafsi kwa ajili ya ndege hizo.

Championi Ijumaa lilifanya mahojiano kuhusiana na Alibhai kama ana ndoto za kutaka siku moja kusaidia soka ya Tanzania, kwani tayari ametoa msaada mkubwa kwa Ivory Coast ambako amekulia na anaendelea kuishi.

Salehjembe: Karibu Tanzania. Je, una mpango wowote wa kusaidia soka hapa nyumbani?

Alibhai: Bado Tanzania ni sehemu ya maisha yangu, siwezi kuondoa kwamba nilizaliwa na kukulia hapa kabla ya kuhama. Ninatamani sana kusaidia na nimeanza mikakati.

Salehjembe: Mikakati ipi hiyo?

Alibhai: Nimezungumza na wakala mmoja wa kuuza wachezaji wa Fifa  ambaye ni Mtanzania, atanisaidia kuwasiliana na Klabu za Yanga, Simba na ikiwezekana Azam ambayo nimeambiwa kuna wachezaji wa Ivory Coast wanacheza katika timu yao.

Salehjembe: Unataka akusaidie kitu gani?

Alibhai: Nimeanza na suala la kuleta wachezaji. Kama watakuwa tayari nitawapa wachezaji, kuna kipa wangu yuko katika timu ya taifa anaitwa Badri Ali (Sangare).

Tuko naye hapa katika kikosi cha timu ya taifa, ni mmoja wa makipa bora, angalia yuko timu ya taifa ya Ivory Coast bado akiwa anacheza timu ya daraja la kwanza. Niliambiwa Yanga wanahitaji kipa, tunaweza kuzungumza.

Salehjembe: Utahitaji walipe kiasi gani kwa kipa huyo?

Alibhai: Vyote vinawezekana, kwangu fedha si kitu kikubwa lakini nataka mafanikio ya wachezaji wangu wakati nikiwa nasaidia soka ya Tanzania kama itawezekana. Tunaweza kukaa na Yanga, huyo wakala atazungumza nao na kujua wana uwezo wa kufanya nini kwa mchezaji huyo na kuona nifanyeje.

Salehjembe: Vipi kuhusu Simba?

Alibhai: Simba pia au hata hao Azam FC, wanaweza pia kuzungumza nami kupitia huyo wakala. Hapa kinachotakiwa ni suala la maelewano. Nimemueleza wakala azungumze nao na ikiwezekana basi wafunge safari na kuja Ivory Coast ambako wataiona timu yangu ya watoto na ile ambayo inashiriki ligi daraja la kwanza.

Salehjembe: Iko katika nafasi gani?

Alibhai: Msimu uliopita ilikuwa bingwa daraja la pili, msimu huu imeshika nafasi ya nne, inaundwa na vijana tu. Nilifanya hivyo ili kuwapa uzoefu zaidi na kwa kushika nafasi hiyo nimewapa ofa ya kwenda Ghana ambako watacheza mechi mbili za kirafiki halafu acha wale maisha kidogo, tayari wako Ghana.

Salehjembe: Baada ya Gervinho, kuna wachezaji wengine walitoka katika ‘akademi’ yako na kucheza Ulaya?

Alibhai: Wako wengi sana, nafikiri zaidi ya 15 na mwaka huu wengine kama wanne au sita watakwenda UIaya. Nina mshambuliaji mmoja anatakiwa na klabu sita za Ulaya ikiwemo ile niliyokuwa namiliki?

Salehjembe: Ulikuwa unamiliki, sasa umeachana nayo?

Alibhai: Niliiuza, wakati fulani kulikuwa na vita Ivory Coast. Ikawa vigumu kwangu kuendelea kufuatilia maendeleo yake.

Salehjembe: Ilikugharimu kiasi gani kuiendesha?

Alibhai: Unajua ni klabu ya daraja la tatu, si klabu kubwa sana. Pamoja na wadhamini kila mwaka nilitoa dola milioni moja (zaidi ya Sh bilioni 1.6). Haikuwa hasara kwangu na mara nyingi sipendi kuhesabu sana kuhusiana na fedha ingawa baadaye nitalazimika kufanya hivyo.

Salehjembe: Gervinho hutampa nafasi ya kurudi katika shule yako?

Alibhai: Mara kadhaa, ni mtu mzuri anayekumbuka alikotoka kiuchezaji. Wako pia wachezaji wengine ambao hurudi kusaidiana na vijana waliopo pale.

Salehjembe: Labda elezea kidogo ukubwa wa shule yako ya soka.

Alibhai: Kawaida tuna wachezaji 40 tu, tunawagawanya katika makundi mawili. Wanasoka na kujiendeleza kisoka. Katika eneo ulilokuja mwaka 2009, utaona kuna viwanja vinne vizuri kabisa, pia kuna viwili vina taa zinazoruhusu kucheza usiku.

Tuna viwanja vya mpira wa wavu kama vile ufukweni. Kuna vyumba vya kulala wachezaji pamoja sebule kubwa. Gym maalum, sehemu ya kupumzikia, sehemu ya chakula na madarasa mawili kwa ajili ya kujifunza mambo kadhaa, lakini kuna basi maalum kwa ajili ya kuwapeleka shuleni.

Salehjembe: Kwa hiyo soka ndiyo biashara yako?

Alibhai: Hapana, ingekuwa ndiyo biashara yangu nisingekuwa hapa. Nafanya biashara mbalimbali, tena ni nyingi sana ndiyo maana unaona naweza kumiliki ndege mbili na sehemu kubwa kama ile. Soka kwangu ni kama kitu kinachofurahisha moyo wangu, napenda kusaidia vijana wakue, napenda kuona wanacheza ndiyo maana naendelea kufanya hivi.

Salehjembe: Una eneo kubwa sana, kuna mipango zaidi ya hapo?

Alibhai: Ndiyo, nataka kujenga hoteli maana timu nyingi zimekuwa zikitaka kuweka kambi eneo hilo. Wameliona limetumia na kila kitu kwa ajili ya mazoezi kipo, lakini hakuna nafasi ya kuishi pale, hivyo nitajenga hoteli ya kisasa ili ikiwezekana timu ziwe zinaweka kambi pale.

Nakumbuka hata Kenya, walitaka kuleta timu yao ya taifa ije iweke kambi kabla ya kucheza na Nigeria, lakini tatizo ni sehemu ya kulala kwa wachezaji wenye hadhi ya timu ya taifa.

Salehjembe: Ukimaliza ujenzi ninaamini siku moja Taifa Stars itapata nafasi ya kuweka kambi?

Alibhai: Kweli, kama watapangiwa kucheza na nchi za Magharibi. Hata wakati wanakwenda kucheza na Gambia, tunaweza kuwasiliana na nikaona kama naweza kusaidia katika gharama za muda za kuweka kambi wakakaa kidogo pale Abidjan.

Salehjembe: Unatarajia kurudi tena Tanzania?

Alibhai: Ndiyo, nafikiri nitarejea na mke wangu niende Zanzibar kwa mapumziko, pia niweze kuwajua watu zaidi hapa.

Salehjembe: Ulitembea kidogo Dar es Salaam?

Alibhai: Ndiyo nilifika hadi Upanga nilipokuwa ninaishi, lakini nilienda hadi pale Karume uwanjani (Ofisi za TFF), maana enzi zile ndiyo ulikuwa uwanja mkubwa wa Dar es Salaam ambao tulikuwa tukienda kuangalia mechi za soka.