MKUTANO WA WANACHAMA SIMBA WAMALIZIKA NA VITUKO KIBAO, RAGE ATAKA KUMTOA BI HINDU

Mkutano wa wanachama wa klabu ya Simba umefanyika leo na kumalizika kwa vituko kibao.

Mkutano huo uliofanyika katika Ukumbi wa Maofisa wa Polisi Oysterbay jijini Dar es Salaam.

Katika moja ya vituko ni Mwenyekiti Ismail Aden Rage kutaka kumtoa mmoja wa wanachama Bi Hindu ambaye ni msanii maarufu wa uigizaji.

Rage aliinuka kutoka meza kuu na kutaka kumtoa Bi Hindu baada ya kuwa akiitikia kwa nguvu.

Mwenyekiti huyo alifika eneo alilokaa Bi Hindu na kutaka kumtoa kwa nguvu, huku akiita askari.

Lakini Bi Hindu akagoma na wanachama wengine wakamsaidia hivyo hakutoka.

Ukiachana na hivyo, mara kadhaa, Rage alijaribu kutaka kuwatoa wanachama walioonyesha kumpinga.

Wakati fulani Rage aliinuka na kucheza kiduku hivyo kufanya ashangiliwe kwa nguvu na wanachama hao.

Pamoja na hivyo, Rage alifanikiwa kuendesha kikao hicho kwa kujibu kibabe na kwa mkato maswali ya wanachama waliokuwa wakimuuliza.

Pia suala la wanachama hao kupewa tiketi za bure kuingilia katika mechi ya kirafiki kati ya Simba na URA iliyochezwa leo kwenye Uwanja wa Taifa jijini Dar, kuliwafanya washangilie na kutotaka kuchangia zaidi.

Watu waliokuwa kivutio katika kikao hicho ni pamoja na mwenyekiti wa zamani wa Msimbazi, Hassan Dalali na Geofrey Nyange ‘Kaburu’ ambaye alijiuzulu nafasi ya makamu mwenyekiti hivi karibuni.