FRED FELIX MINZIRO AWAONYA WACHEZAJI WAVIVU YANGA

 Kocha Msaidizi wa Yanga, Fred Minziro, amewaambia wachezaji wapya waliosajiliwa na timu hiyo kuwa, mchezaji mvivu hatapata nafasi kwenye kikosi chake.

Miongoni mwa wachezaji waliosajiliwa na timu hiyo ni Mrisho Ngassa, Hussein Javu, Rajab Zahir, Deogratius Munishi 'Dida', Shaabani Kondo na Hamis Thabit.

Akizungumza na Championi Jumatatu, kocha huyo alisema ili mchezaji apate nafasi ya kucheza kwenye kikosi cha kwanza, ni lazima ajitume mazoezini.

Minziro alisema, pia nidhamu ya mchezaji inahitajika nje na ndani ya uwanja ili kutimiza vizuri majukumu atakayopewa kwenye mechi.

“Wachezaji wapya tuliowasajili wanatakiwa watambue kuwa ili wapate nafasi ya kucheza kwenye kikosi cha kwanza, wanatakiwa wasiwe wavivu wa mazoezi.

“Ili mchezaji apate nafasi kwenye kikosi cha kwanza, lazima ajitume ndani ya uwanja, pia nidhamu inahitajika ndani na nje ya uwanja,” alisema Minziro.