DHAIRA AAMUA KURUDI ULAYA KUMFUATA DAKTARI

DHAIRA MAZOEZINI SIMBA

Kipa namba moja wa Simba, Abel Dhaira amesema bado anasikia maumivu katika kiwiko cha mkono wa kushoto na kudai kuwa amepanga kwenda nchini Iceland barani Ulaya kupata matibabu zaidi kwa daktari anayeamini atamtibu.

Dhaira raia wa Uganda amesema licha ya kupata matibabu mara mbili akiwa hapa nchini na hata yale aliyoyapata wiki moja iliyopita Uganda, bado hayajamaliza tatizo hilo.

Dhaira amesema amepanga kutua nchini Iceland mwezi ujao endapo atapata ruhusa kutoka kwa uongozi wa Simba, ambapo huko kuna daktari mzuri ambaye tayari ameshazungumza naye tayari kwa kumtibu vizuri tatizo hilo.

“Bado nasikia maumivu katika kiwiko, nimepata matibabu kwa nyakati tofauti hapa Tanzania na hata hivi karibuni nilivyorudi nyumbani (Uganda), lakini bado hayajasaidia kama nilivyokuwa nategemea,” alisema Dhaira ambaye amejiunga na Simba msimu huu akitokea IBV ya Iceland.

Mpango huo wa Dhaira, unakuja kufuatia kuumia mwezi uliopita wakati akiwa katika mazoezi ya timu hiyo, katika kambi yao iliyopo kwenye Fukwe za Bamba, nje kidogo ya Jiji la Dar, eneo la Kigamboni.