NIGERIA YAICHAPA MALAWI, MOSES AIMALIZA KWA BAO LA PENALTI

Nigeria imefanikiwa kusonga katika hatua ya mwisho kuwania kucheza Kombe la Dunia baada ya kuwafunga wageni wake Malawi kwa mabao 2-0.

Mabao ya Nigeria ‘The Super Eagles; yamefungwa na Emmanuel Eminike katika dakika ya 44 na mshambuliaji Victor Moses wa Chelsea ambaye amekwenda Everton kwa mkopo akafunga la pili katika dakika za mwisho kwa mkwaju wa penalty.

The Flames walikuwa wamepania kushinda mechi hiyo iliyochezewa dakika  chache zilizopita kwenye Uwanja wa UJ Esuene mjini Calabar, Nigeria

Nigeria ilitawala kipindi cha kwanza kuanzia katika na ikafanya hivyo mara tu baada ya kuanza kwa kipindi cha pili huku kiungo wa Chelsea, John Mikel Obi akitawala dimba.

Hivi karibuni, Kocha Mkuu wa Malawi, Tom Saintfiet aliyewahi kuifundisha Yanga ya Tanzania aliingia katika mgogoro mkubwa na kocha wa Nigeria, Stefen Keshi ambaye alimuita mpuuzi kwa kulaani mechi hiyo kupelekwa kwenye mji wa Calabar.

Beki Limbikani Mzava wa Malawi alitolewa kwa kadi nyekundu baada ya kumuangusha Ahmed Musa na Moses akafunga mkwaju huo.

Droo ya kupanga timu zitakazocheza katika hatua ya mwisho itafanyika Septemba 16 jijini Cairo, Misri.