SIMBA YAWEKA REKODI YA KUWA TIMU YENYE VIJANA WENGI ZAIDI KATIKA KIKOSI KINACHOSHIRIKI LIGI KUU

Simba ndiyo timu iliyoweka rekodi kwa msimu wa pili mfululizo kuwa na kikosi kinachoshiriki Ligi Kuu Bara chenye vijana wengi zaidi.

Msimu uliopita, Simba ilitumia wachezaji wake makinda wengi kuliko timu nyingine. Awali mashabiki wengi walilalamika sana lakini baadaye wakabadilika na kuwaunga mkono wachezaji wao.

Timu iliishia katika nafasi ya tatu huku ikivuliwa ubingwa na watani wake wa jadi Yanga, lakini bado ikawa imejenga msingi wa vijana.

Pamoja na uongozi kuamua msimu kusajili wakongwe kadhaa ili kuunda kikosi imara, lakini bado Simba inaendelea kuwa na vijana wengi zaidi katika kikosi chake kinachoshiriki ligi kuu.

Picha hii inaweza kuwa mfano mzuri, kwani hili ndilo benchi la Simba wakati ilipocheza jana dhidi ya KMKM ya Zanzibar kwenye Uwanja wa Taifa jijini Dar.

Katika mechi hiyo ya kirafiki, wachezaji wengi vijana walikuwa katika benchi kama wanavyoonekana hapa katika picha, kwani kati ya wachezaji wote mkongwe ni Betram Mombeki na waliobaki, wengi ni chini ya miaka 20.

Huenda ni mfumo mzuri ambao umeanzishwa na Simba lakini itakuwa vizuri zaidi vijana hao pia wakapewa nafasi ya kucheza kwa kuwa msimu uliopita walionyesha uwezo mkubwa na kuwa wanaweza kucheza katika kikosi cha kwanza na kufanya vizuri.