SUMU YA UYANGA, USIMBA ISISAMBAZWE JESHINI…

 

Hakuna ubishi Ligi Kuu Tanzania Bara ni ngumu zaidi kama utalinganisha na nyingine katika Ukanda wa Afrika Mashariki na Kati.

Inawezekana kukawa na upinzani mkali kutoka DR Congo, lakini hakuna ligi inayoweza kulinganishwa na ile ya Tanzania Bara hasa kutoka Burundi, Rwanda, Uganda na hata Kenya ambako ninaweza kusema kuna angalau nafuu kidogo.

Inawezekana kabisa pamoja na utajiri wa baadhi ya timu kama Yanga, Simba, Azam FC, Coastal Union na nyingine, bado kuna changamoto inayopatikana na inazidi kuongeza ugumu katika ligi hiyo ya hapa nyumbani.

Katika ligi hiyo yenye timu 14, sita kati yake ni za jeshi ambazo ni JKT Ruvu, Ruvu Shooting, JKT Oljoro, Mgambo JKT, Prisons na Rhino Rangers.

Kama asilimia zaidi ya 40 ni timu za jeshi, hakuna ubishi ndiyo zinazoongeza ugumu wa ligi hiyo kama sehemu ya changamoto kubwa kutokana na ubora wa timu hizo.

Hakuna ubishi timu hizo zimekuwa zikitoa changamoto kubwa ya ushindani kutokana na zinavyocheza na mara nyingi zinazitoa jasho timu vigogo kwa kuwa hulazimika kufanya kazi ya ziada kupata ushindi.

Mfano Yanga, Simba, Azam FC au Coastal Union zinatambua ugumu zinapokutana na timu za jeshi kwamba si lelemama na hulazimika kufanya maandalizi ya kutosha ili kuhakikisha zinashinda dhidi ya timu hizo.

Hata kama watakuwa hawachezi soka la kuvutia sana, timu hizo za majeshi zimekuwa fiti sana na zinaongeza ugumu wa ligi hiyo kwa kuwa imekuwa ni ligi ya wanaume kweli.

Pamoja na yote hayo, ninachotaka kuweka sawa ni namna ambavyo imekuwa karibu kila msimu ambapo huanza kwa timu za jeshi kuongoza na baada ya hapo zinaporomoka taratibu.

Siamini kwamba timu hizo za jeshi zinaporomoka na kupoteza mwelekeo kutokana na kushindwa kuvumilia mikiki ya ligi kwa maana ya uwezo wa mazoezi ya kutosha au uwezo wa kucheza soka.

Lazima kutakuwa na kasoro nyingine ambazo ni suala la fitna za soka, pia sumu ya Uyanga na Usimba kuingizwa ndani ya timu hizo.

Ushabiki wa kupindukia wa timu hizo mbili ni sehemu ya sumu inayofanya maendeleo ya soka nchini kutokuwa na kasi sahihi. Wako ambao hawakubali tena timu hizo za jeshi zishinde kwa kuwa tu zinacheza na Yanga au Simba.  Hili si sahihi!

Najua ushabiki ulivyo na nafasi, lakini si sahihi kushambulia paa la kibanda unachoishi ili umfurahishe jirani aweze kuwachungulia mnapokuwa mmelala. Sumu hiyo itupiwe jicho na iepukwe.

Timu za jeshi hazisumbuki kwa njaa ya chakula wala kambi kwani kila kitu kinapatikana. Maana yake zinapata matunzo ya kutosha na kuna uwezekano wa kufanya vizuri zaidi, kwani hata kama mishahara yao haitakuwa mikubwa sana,  kamwe haichelewi au kuzungushwa.

Hii ni sehemu ya kuonyesha timu hizo zina kila sababu ya kufanya vizuri zaidi ya ilivyozoeleka. Lakini kwa wale wanaopenda Yanga au Simba halafu ni waajiriwa wa timu hizo, lazima watazame mbele zaidi kwamba ofisi yao ni moja, ushabiki unafuatia.

Inawezekana ukaishi bila ya kuwa shabiki wa Yanga au Simba na unaweza kuchangia maendeleo ya soka nchini bila ya kuzishabikia timu hizo. Wako wanaoshabikia kwa kufuata mkumbo au imani kuwa lazima uwe shabiki wa njano au nyekundu.  Ukweli ni kwamba mambo yanakwenda yanabadilika.

Kwa hiyo, walio ndani ya timu za jeshi, wasiue juhudi  za wengine kwa makusudi ili kuridhisha nafsi zao. Wako ambao wanakubali kuwa ‘watumwa’ na kumaliza juhudi za wengine wanaotaka mafanikio ya timu hizo. Hivyo fanyeni kweli kusaidia kuwepo kwa ushindani mkubwa zaidi.

Ushindani ukiwa ni wa dhati na wa juu, utasaidia hata bingwa anayepatikana kuwa imara atakapokwenda kwenye michuano ya Afrika badala ya kuwa na bingwa aliyepita ‘kimagumashi’ ambapo anakwama katika raundi za awali.

FIN.