KOCHA MBEYA CITY AUMIZWA NA ALICHOFANYA BOBAN

Na Mwandishi Wetu

Mmoja wa makocha bora wa soka wazalendo, Juma Mwambusi, ameeleza kuumizwa na tabia aliyoionyesha kiungo nyota wa Coastal Union, Haruna Moshi ‘Boban’.

Mwambusi ambaye amekuwa akifanya vizuri na kikosi cha Mbeya City, amesema alishangazwa kuona Boban akimshambulia kwa maneno makali mwamuzi msaidizi, Hamis Chang’walu wakati walipocheza na Coastal Union juzi na kutoka sare ya bao 1-1 jijini Mbeya.

“Kweli nilisikia Boban akizungumza maneno ambayo si mazuri kwenye mchezo kwa kuwa ilikuwa karibu kabisa na nilipokuwa.

“Ninaamini Boban ni mchezaji bora ambaye hata mimi au kocha mwingine anaweza kutamani kumjumuisha katika kikosi chake. 

Tumekuwa tukisikia kwenye vyombo vya habari kwamba amebadilika sana.

“Lakini alichokifanya hakikuwa sahihi, unajua alikasirishwa na Chang’walu kuinua kibendera cha kuonyesha ameotea, alichofanya Boban alijaribu kuepuka ‘offside’ lakini ikashindikana. Hapo ndiyo ukaanza mzozo naye akafanya alichofanya,” alisema Mwambusi.

“Si kwamba ninataka kumsakama, lengo ni kutoa ushauri kwamba waamuzi wakati mwingine wanaudhi sana. Mfano mimi nimeona mara tatu tulistahili kupata penalti lakini sikumtukana mwamuzi au kusema maneno machafu.

“Lakini ajifunze, kama amebadilika iwe kweli na ikiwezekana basi wajitokeze watu wamsaidie, wamshauri tena na tena,” aliongeza.

Katika mechi hiyo, kabla ya kulambwa kadi nyekundu, Boban ndiye aliifungia Coastal Union bao na ‘wabishi’ Mbeya City wakasawazisha.