YANGA WAMWANDIKIA BARUA WAZIRI NCHIMBI

Wanachama wa Yanga wanaotaka kufanya maandamano wameamua kuandika barua kwa Waziri wa Mambo ya Ndani, Emmanuel Nchimbi.

Habari za uhakika kutoka kwa mmoja wa wanachama hao zinaeleza, wameamua kuandika barua ya kuomba ruhusa ya kuandamana kupiga uonevu wanaofanyiwa na TFF.

“Kweli tumemuandikia Waziri Nchimbi na imepokelewa ofisini kwake hata ushahidi tunao. Tumeamua kufanya hivyo baada ya kuona Jeshi la Polisi Kanda ya Dar es Salaam wanatuzungusha.

“Tuliomba kibali cha maandamano, wao wakatupa kibali cha mkusanyiko. Tukawaeleza vizuri tunachotaka wakawa wanatuzungusha ndiyo maana tumeona tuvuke hadi kwa waziri na sasa tunasubiri,” alisema mwanachama huyo.

Kuhusiana na suala hilo, uongozi wa Yanga umekuwa ukikataa kulizungumzia na kusema wanachama ndiyo wanaohusika.

Wanachama hao wanataka kufanya maandamano ya amani kupinga moja kwa moja suala wanalodai ni uonevu wa TFF dhidi yao katika mambo mbalimbali.

Tayari TFF imeishaonya kuhusiana na hilo, kwamba viongozi wanapaswa kulishughulikia suala hilo kabla ya maandamano kufanyika.