ONA JANA, DALILI KUWA SIMBA,YANGA ZITABAKI MASIKINI MILELE

Mara kibao nimekuwa nikizungumzia kuelezea namna ambavyo klabu kongwe nchini zilivyo na utajiri  mkubwa wa watu lakini zimekuwa hazifanyi lolote kuutumia kujipatia maendeleo.

Mechi ya jana iliyowakutanisha ndiyo mechi kubwa kuliko zote katika ukanda wa Afrika Mashariki na Kati na inawezekana ikawa moja ya mechi tano kubwa kabisa barani Afrika.

Mechi ambayo ina uwezo wa kuiginza hata Sh milioni 600, lakini fedha za mapato zimekuwa hazifikii hapo kwa kuwa wengi wamekuwa wakifaidika na fedha nyingi kwenda mifukoni mwao.

Yanga na Simba, zina mashabiki zaidi milioni 30 kwa hapa nchini, inawezekana kabisa kama zingekuwa na mipango madhubuti kujenga timu kubwa na zenye ubunifu za masoko, basi zingekuwa zinaingiza mamilioni ya fedha.

Hazifanyi hivyo kwa kuwa siasa inaizidi hali halisi ya maisha ya klabu hizo, viongozi wengi wanaoongoza ni wale wanaotaka kutengeneza majina yao, wanaozuia kwa makusudi maendeleo makubwa kwa kuwa wanajua siku chache zijazo wataondoka, hivyo hawataki wengi wakute kuna maendeleo badala yake, kila kiongozi anayeingia analazimika kuanza mwanzo.

Simba na Yanga, jana zinegeweza kupata mapato makubwa kama ilivyokuwa kwa kuwa tiketi ziliisha ndani ya saa 10 tu. Na bado ilionekana kuna watu walikuwa wakitaka wapate tiketi, lakini ikashindikana.

Lakini kiongozi yupi ambaye alihakikisha kunakuwa na wadhamini ambao wangeweka mabango ambayo yangewaingizia angalau Sh milioni 150 kwa siku hiyo, hata kama wangetakiwa kugawana na bodi ya ligi.

Kama wangekuwa na timu bora ya masoko, kwa miezi ingekuwa ikienda na kuzungumza na wadhamini kuwaeleza kwamba mechi hiyo itaangaliwa na watu zaidi ya 60,000 pake uwanjani. Lakini kupitia Azam TV, watu zaidi ya milioni tano wataangalia mechi hiyo.

Kwa wadhamini ambao wanataka kujitangaza wangekuwa kutoa matangazo na kuweka pale uwanjani na kuyalipia. Lakini hakuna mtu hata mmoja kutoka Simba au Yanga aliyejaribu kufanya hivyo ili kuongeza kipato.

Hiyo ni fursa ambayo inaanchwa ipite kimyakimya huku viongozi wa Yanga na Simba, zaidi wakiangalia ushindi pekee ili wapate sifa na kukubalika kwa wanachama wao.

Klabu hizi zinaendeshwa kisiasa sana, ndiyo maana timu zake mara kwa mara zimekuwa zikilalama kuhusiana na fedha iwe ya kambi au vinginevyo, lakini mirija ya kupata fedha na kumaliza matatizo hayo imefinywa na viongozi wenyewe.

Wiki mbili nzima, gumzo la Simba dhidi ya Yanga lilikuwa juu, lakini hakuna hata kiongozi mmoja alifikiri namna timu hizo zinaweza kuingiza fedha za ziada zaidi ya zile za mapato ya uwanjani.

Nawaambia lakini hamtaki kukubali, kwamba viongozi wengi wamekuwa na mawazo yaleyale tokea akina Abdallah Kibadeni na Gibson Sembuli wakicheza soka.

Kwamba vipi waende kwa waganga, kambi ilindwe, nani atupiwe lawama kama mchawi iwapo atashindwa na kadhalika.

Aghalabu kwao kusikia wanazungumzia kuhusiana na uingizaji wa fedha, mbaya zaidi wanataka kuwa kama Manchester United, Real Madrid, Barcelona na timu kubwa nyingine za Ulaya.

Hakika ni ndoto za mchana, badala yake viongozi wabadilike na vizuri waamini Yanga na Simba ni timu na zina uwezo wa kutengeneza fedha nyingi zaidi kwa kuingiza kila moja zaidi ya Sh milioni 300 na hasa zinapokutana.

Mechi yao ni biashara kubwa, lakini kutokana na walivyolala, kila Yanga na Simba zinapocheza, wako wanaotajirika na kuingiza mamilioni. Umasikini unabaki umeziganda klabu hizo kubwa ambazo ukubwa wao ni jina, ndani ya mfuko, hohehahe!