YANGA, SIMBA WALIA KUNA MCHEZO MCHAFU SARE YA 3-3, KIPA, VIUNGO WATAJWA

BARTHEZ AKIDAKA MPIRA MBELE YA MWOMBEKI WA SIMBA, LEO.

 Sare ya 3-3 ya Simba na Yanga leo, inaonekana haiwezi kwenda hivihivi bila ya mchawi kusakwa.

Tayari Simba wamesema kuna watu wanawahujumu, Yanga pia wametamka waziwazi kwamba wana hofu na kipa wao, Ally Mustapha ‘Barthez’.

HUMUD (KUSHOTO) NA CHANONGO (KATIKATI) WAKIWANIA MPIRA

Kocha Mkuu wa Simba, Abdallah Kibadeni amesema wazi amekerwa na baadhi ya wachezaji wanaofanya makusudi kuwahujumu.

“Wanataka kutuhumu kwa makusudi, hawataki kucheza mpira na wanafanya makusudi kutuangusha.

“Tulipoingia vyumbani wakati wa mapumziko, nikawaambia kama kutuhujumu na kuiachia Yanga mabao matatu, basi inatosha, basi kipindi cha pili tucheza mpira.

“Utaona vijana walioingia wamefanya vizuri na wamecheza na kuleta mabadiliko, lakini ikifika wakati nitawaja hawa wanaofanya huu upuuzi,” alisema Kibadeni.

Katika mchezo huo aliwatoa Haruna Chanongo na Abdulhalim Humud na kuwaingiza Luciano na Sain Ndemla ambao ni makinda lakini wakabadili mchezo.

Kwa upande wa Yanga, mmoja wa viongozi wa vijana, Bakili Makele alisema wana hofu kutokana na mabao aliyofungwa Barthez.

“Kweli umefika wakati wa uongozi kuchukua hatua, hii si haki. Mabao aliyofungwa Barthez si sahihi na yanaonyesha kuna chembe za hujuma.

“Si leo tu, hata Kagera na kwingine haya mambo yalitokea. Imenikera na tumeumia sana kama Wanayanga,” alisema akionyesha jazba.

Hata hivyo, mabao waliyofungwa Yanga yanaonyesha wazi yalikuwa makosa ya mabeki na wala si kipa huyo.