MAKALA: ALICHOKISEMA MANJI KUHUSU KASEJA NI MAPINDUZI KATIKA SOKA NCHINI

JUMAMOSI iliyopita, mabingwa wa Tanzania, Yanga walipoteza mchezo wao wa kirafiki wa Nani Mtani Jembe dhidi ya watani wao Simba baada ya kukutana na kipigo cha mabao 3-1.

 

Katika mechi hiyo, mashabiki wengi zaidi wa Yanga walijitokeza wakiamini timu yao itaibuka na ushindi kwa kuwa ina kikosi bora kabisa katika kila idara.

Kuongezeka kwa Emmanuel Okwi katika kikosi cha Yanga, kulisababisha kuonekana kama mchezo huo wa watani tayari matokeo yalipatikana na uhakika ulikuwa ni Yanga kuibuka na ushindi.

Ndiyo maana wiki moja kabla ya mchezo huo, mashabiki wa Yanga walikuwa wakitamba barabarani kwamba wanachotaka kujua ni idadi ya mabao watakayowafunga watani wao lakini suala la ushindi lilikuwa na uhakika tayari!

Ajabu Yanga wanaonyesha ni wasahaulifu sana, si zaidi ya miezi miwili tokea Simba walipowaamsha kwa kusawazisha mabao yote matatu waliyofunga katika kipindi cha kwanza na kufanya matokeo ya mechi hiyo ya Ligi Kuu Bara kumalizika kwa sare ya bao 3-3 wakati Yanga waliamini ilikuwa ni siku sahihi ya kulipa kisasi cha mabao 5-0.

Soka ina mambo yake, kila mechi haishi bila kuacha gumzo ndiyo maana Yanga ikajisahau tena na safari hii ikakutana na kipigo cha mabao 3-1 na Simba wakaweka rekodi ya kwanza kuishinda Yanga ikiwa chini ya uenyekiti wa Yusuf Manji.

Kufungwa kwa Yanga kwa idadi hiyo ya mabao ilionekana kama ajabu kwa mashabiki lakini kama ilivyo ada, lazima kuwe na wa kubebeshwa lawama, mashabiki ‘wakamuangukia’ kipa Juma Kaseja.

Kaseja alifungisha bao la tatu kwa bahati mbaya, alianguka wakati akijaribu kuumiliki mpira na Awadhi Juma wa Simba akamchepuka na kuupachika mpira wavuni.

Baada ya hapo gumzo likawa ni Kaseja ndiye msaliti na wengine wakisema ametokea Simba. Ajabu zaidi hata mmoja wa wazee wa Yanga, ….Akilimali naye akathubutu kusema uongozi wa Yanga ulikosea kumsajili Kaseja kwa kuwa ni Simba na badala yake ungemsajili kipa Ivo Mapunda.

Kitu ambacho ni cha kuzungumzia hapa ni ujasiri wa Mwenyekiti wa Yanga, Yusuf Mehbub Manji ambaye siku moja tu baada ya Yanga kufungwa mabao 3-1, aliitisha mkutano wa waandishi wa habari na kufafanua mambo kadhaa.

Moja ya mambo hayo, Manji alieleza kosa la Kaseja ni sehemu tu ya mchezo na kuwataka mashabiki kuachana na kumlaumu na badala yake waungane na kuangalia watarekebisha vipi makosa yaliyojitokeza ili waweze kwenda mbele.

Lakini Manji pia alimkemea hadharani Mzee Akilimali kwamba alichosema hakikuwa sahihi na hapaswi kumshambulia Kaseja au kuonyesha uongozi ulikosea kumsajili kama amavyo alisema yeye.

Manji ameonyesha ujasiri na tofauti kubwa na viongozi wengi waliopita wa Yanga na hata Simba, kwani kamwe hawawezi kuwasaidia wachezaji wao wanapokuwa katika wakati mgumu kama ilivyokuwa kwa Kaseja.

Manji hawezi kumtetea Kaseja huku akijua amefanya madudu, ameonyesha ni mwelewa lakini anayetambua kuwa kwenye soka, makosa ni lazima na Kaseja ni mmoja wa makipa bora Afrika Mashariki na Kati ambaye angefurahi kuona Yanga inashinda ili kuthibitisha uwezo wake.

Kumshambulia kwa kujali maneno ya kishabiki zaidi haikuwa sahihi, Manji ameonyesha si mwoga na ameweka mambo hadharani na leo anaeleweka na wengi. Lakini viongozi wengi wamekuwa kimya na hata wakati mwingine kuungana na wengine kuwashambulia wachezaji.

Manji amefungua njia, suala la Kaseja ni moja tu. Katika klabu za soka nchini kuna mambo mengi na kama wenyeviti na viongozi wengine wataamua kuwa wakweli, wasioyumba au kufanya kazi zao kinafiki kama ilivyokuwa kwa mwenyekiti huyo wa Yanga basi mambo yatabadilika.