ANGALIA TIKETI LIGI KUU ZITAKAVYOUZWA KUTUMIA MTANDAO WA SIMU

Shirikisho la Soka Tanzania (TFF) limetangaza rasmi utumiaji wa tiketi za elektroniki zitakazoanza kutumika kwenye mzunguko wa pili wa Ligi Kuu Bara utakaoanza Januari 25.

Akizungumza na waandishi wa habari jijini Dar es Salaam, Ofisa Habari wa TFF, Boniface Wambura, alitoa ufafanuzi juu ya upatikanaji wa tiketi hizo ambapo aliwasisitiza wanunuzi kwamba watapata tiketi hizo kupitia njia kuu tatu ambazo ni M-PESA  kwa kupiga *150*03*02#, njia ya CRDB Simbanking ambapo atapiga namba *150*03# na kwa njia ya Fahari Huduma ambapo atapatiwa namba ya tiketi.

Aidha, alisema kuwa tayari tiketi hizo zilikwishaanza kujaribiwa katika mechi ya kirafiki baina ya Azam FC dhidi ya Ruvu Shooting katika Uwanja wa Chamazi kabla ya mechi nyingine itakayopigwa leo kwenye uwanja huo kati ya JKT Ruvu na Ashanti United.

Aliongeza kuwa baada ya mteja kufanya muamala huo, atakwenda katika vibanda maalum vya kutolea tiketi (uchapishaji) akiwa na namba ya tiketi aliyonunua kwa kutumia njia mojawapo kati ya hizo tatu. Lakini mteja atakatwa kiasi cha Sh 500 akitumia M-PESA na Sh. 300 akitumia njia ya CRDB.

“Baada ya kununua tiketi hiyo, mteja atakwenda katika vibanda maalum vya uchapaji wa hizo tiketi akiwa na namba yake ya tiketi,” alisema Wambura na kuongeza  kuwa tiketi hizo hazipatikani pale uwanjani. Kuna vituo maalum ambapo zitakuwa zinapatikana na si uwanjani.”