MAPUNDA AWAONYA WENZAKE KUHUSIANA NA WAKENYA LEO

 

IVO WAKATI GOR MAHIA

Kipa wa Simba, Ivo Mapunda, amewataka wachezaji wenzake na timu nyingine kwa jumla kuwa makini na mabingwa wa kihistoria wa Kenya FC Leopards katika michuano ya Mapinduzi itakayofunguliwa leo Visiwani Zanzibar.

Simba itaanza mbio hizo kwa kuwavaa Wakenya leo kabla ya kukutana na mabingwa wa Visiwani KMKM na Kampala City Council KCC kwenye Kundi B.

Aidha, Mapunda anaifahamu vyema Leopards kwani ni mahasimu wakubwa wa timu yake ya zamani ya Gor Mahia kabla ya kusaini Simba dirisha dogo msimu huu.

Akizungumza na Championi Jumatano alisema Leopards ya mwaka huu ni tishio kutokana na usajili waliofanya dirisha hili na kusema si Simba inayotakiwa kuwa makini bali ni wito kwa timu zote.

“Kikweli kwa usajili waliofanya dirisha hili, Leopards siyo ya kubeza, tunatakiwa kujiweka fiti hasa. Niliwaona wakati wa mechi yangu ya mwisho nikiwa Gor Mahia (Ngao ya Hisani), hakika wameongeza kitu fulani. Timu zinatakiwa kuwa makini nao na hata sisi ndiyo maana tunajifua zaidi.  Nawajua vyema,” alisema kipa huyo wa zamani wa Yanga na African Lyon.