WANACHAMA WALIA, WASEMA TFF IMEMGWAYA ISMAILI ADEN RAGE

Wanachama wa Simba wamepinga maamuzi yaliyotolewa na Shirikisho la Soka Tanzania (TFF) juu ya mwenyekiti wa klabu hiyo Ismail Aden Rage.

Wakizungumza kwenye mkutano waliouandaa jana, wanachama hao kutoka sehemu mbalimbali nchini walisema hawakutarajia kama TFF ingetoa maamuzi kama hayo kwa mwenyekiti wake na kwamba walitegemea kuona shirikisho hilo lingesimamia kwa sheria na katiba suala hilo lakini wamefanya ndivyo-sivyo.

Walisema wameshangazwa na hatua ya kumtaka mwenyekiti huyo ajaze nafasi zilizoachwa wazi ikiwemo ya makamu mwenyekiti ambayo kikatiba alitakiwa afanye hayo ndani ya siku 90 na mpaka sasa zimefikia siku 270 bila kufanya lolote.

Kwa hali hiyo wamesema watamuandikia barua Rage ya kumtaka aitishe mkutano wa dharura ambao lengo  lao kubwa ni kujadili uvunjwaji wa katiba  na marekebisho ya katiba mpya ya klabu hiyo na nakala moja wataipeleka TFF.

“Hatukubaliani kabisa na maamuzi ya TFF juu ya suala hili la Rage kumrejesha kama mwenyekiti na pia kumtaka kuchagua makamu mpya wakati  siku zimepita,” alisema Makamu Mwenyekiti wa Tawi la New Mapambano Temeke-Mwisho mwenye kadi namba 087.

“Rage ni tatizo Simba tena ni kwa muda mrefu, huyu kidume anatusumbua sana, tulijua TFF mpya ingesimamia kwa haki suala hili lakini nayo imekosea, inaonekana kumbeba Rage ambaye anafanya mambo mengi kienyeji, sijui wanamuogopa!” alisema mwanachama Hussein Mwaikamba wa Iringa mwenye kadi namba 06563.