MAKALA: KUTOKA MBAGALA HADI MSHAHARA WA SH MILIONI 16 KWA MWEZI

Na Saleh Ally

MIAKA minne iliyopita, mshambuliaji Mbwana Ally Samatta hakuwa na umaarufu wowote katika soka hapa nyumbani zaidi ya kusikika kwa mbali wakati akiitumikia timu yake ya African Lyon.

Lyon iliyokuwa ikimilikiwa na mfanyabiashara maarufu Mohammed Dewji ‘Mo’ ilikuwa ikipambana kupanda Ligi Kuu Bara, kipindi hicho kinda Samatta hakuwa maarufu lakini kwa aina ya uchezaji wake na msaada mkubwa kwa timu yake, taratibu jina likaanza kupanda.

Msimu mmoja tu baada ya kushiriki Ligi Kuu Bara, Dewji aliamua kuiuza timu hiyo na baadaye kumuacha Samatta aende Simba ambayo aliitumikia kwa msimu mmoja tu kabla ya kuuzwa TP Mazembe ya DR Congo.

Muda huo mchache sasa Samatta ni mmoja wa wachezaji ghali barani Afrika na ndiye anayelipwa kuliko wote wanaocheza soka kutoka Tanzania, bila ya kujali wako barani Afrika, Asia au Ulaya.

Mshahara wa Samatta na TP Mazembe kwa mwezi ni dola 10,000 (zaidi ya Sh milioni 16), maana yake mshahara wake unaweza kuwalipa wachezaji wa timu moja ya Ligi Kuu Bara kwa mwezi.

Mfano ni timu za jeshi kama JKT Ruvu, Ruvu Shooting, JKT Oljoro na nyinginezo, lakini timu kama Ashanti ni kati ya zile ambazo mshahara wa mwezi wa Samatta unaweza kuwalipa wachezaji wao kwa asilimia 90 au 100 kabisa.

Lakini mshahara pekee hautoshi kuonyesha mabadiliko ya haraka sana ya Samatta, vitu vingine vikubwa viwili ni thamani anayopewa kwa kipindi hiki kuwa imefikia dola pauni 450,000 (zaidi ya Sh bilioni 1.2).

Hakuna mchezaji wa Tanzania ambaye aliwekwa kwenye soko kupitia mitandao maarufu ya mauzo ya wanasoka na akafikia thamani ya Samatta.

Hiyo haitoshi, kuonyesha kuwa thamani hiyo si uongo, Klabu ya Al Ain inayoshiriki Ligi Kuu ya Falme za Kiarabu ((UAE), tayari iko tayari kutoa dau la dola milioni 1 (zaidi ya Sh bilioni 1.6) ili kumnasa Samatta akakipige kwenye timu yao.

Samatta ni kijana wa Mbagala ambaye hakuwa na umaarufu wa juu kama Mrisho Ngassa, Athumani Iddi Chuji, Haruna Moshi ‘Boban’ lakini alipofikia ni hatua nyingine kabisa ambayo ina mambo mengi ya kujifunza.

Hana digrii wala ‘mastaz’, lakini mshahara wake ni maradufu wa ule wa bosi wa benki, mhasibu mkuu wa wizara na hata mawaziri.

Samatta ni tishio kwenye Ligi ya Mabingwa Afrika, timu yoyote, zikiwemo Al Ahly, Zamalek, Orlando Pirates, Esparance na nyingine kubwa zikisikia zinakutana na TP Mazembe, basi mahesabu yanaanzia namna ya kumzuia.

Kujivunia Samatta kwa kila Mtanzania bila ya kujali ushabiki ni jambo zuri, lakini litakuwa ni jambo jema zaidi kama kumbukumbu ya alikopita na alipofikia ndiyo ikawa njia sahihi zaidi ya kujivunia na kujifunza pia.

Kufikia alipo Samatta kunaonyesha kuwa Tanzania ina wachezaji wengi sana wenye vipaji vinavyoweza kudhihirisha ubora wao kwa kiasi kikubwa.

Lakini kumekuwa na dharau kwa kuwa bado imani iko juu sana kwamba hakuna anayeweza kufanikiwa kama mastaa walio Simba, Yanga au Azam kwa kipindi hiki, lakini Samatta amewapita kama upepo wa kimbunga, na sasa wanamsoma kwa mbali mno.

Pia, kumekuwa na viongozi wenye roho ya husda wasiotaka kuwaona vijana wengine wakifanikiwa kwa maslahi yao binafsi, au wakiamini mchezaji akiondoka Simba au Yanga itadhoofika, hivyo wanamlaghai, anabaki na miaka miwili anaonekana hana maana  na inabidi wanaachane naye.

Samatta amefanikiwa kupiga hatua kubwa sana katika miaka minne tu, kati ya hiyo miwili na ushee akiwa na TP Mazembe. Sasa ndiye staa wa TP Mazembe, Lubumbashi na DR Congo yote. Wako wengine wanaoweza kupita wakafika mbali, basi wajitume lakini viongozi wapeni njia kama Simba walivyokubali kwa Samatta kuliko kuendelea kuwang’ang’ania vijana na mwisho, mnawatupa kama matambala ya deki.

Samatta Data:

Ndoa na TP Mazembe:

Miaka 2, Miezi 7, Siku 6

Ligi ya Mabingwa

Mechi  17

Mabao 9

Kufuzu Kombe la Dunia:

Mechi  7

Mabao 2

Kufuzu Can:

Mechi 5

Mabao 2

Fin.