NDIYO WACOMORO NI VIBONDE, LAKINI YANGA WAINGIE NA TAHADHARI

YANGA inashuka dimbani leo katika mechi yake ya kwanza ya Ligi ya Mabingwa Afrika kuwavaa vibonde Komorozine de Moroni kwenye Uwanja wa Taifa jijini Dar.

Wiki mbili baadaye Yanga itakuwa Moroni kurudiana na mabingwa hao wa Comoro, lakini muhimu zaidi ni mechi ya leo Taifa.

Timu huyo inajulikana kuwa ni kibonde kutokana na historia ya soka katika nchi hiyo.

Hata Yanga imewahi kuanza michuano hiyo na timu kutoka Comoro na ‘kujipigia’ inavyotaka.

Hali hiyo imejenga dharau hata kwa mashabiki kwamba Yanga ina kazi lahisi sana leo, kitu ambacho si sahihi.

Mashabiki wanaweza kufikiri hivyo, lakini litakuwa kosa kubwa kwa wachezaji wa Yanga kuingia huko, watakwisha.

Wanachotakiwa ni kuifunga timu hiyo hata mabao 20 kama itawezekana.

Lakini kuwa makini kwa kuwa ni timu ya mpira ambayo uwezo wake haujaonekana, hakuna anayejua, hivyo lazima wacheze kwa umakini mkubwa.

Yanga haitaungwa mkono na Wanayanga pekee kwa mechi ya leo, badala yake Watanzania waelewa na wazalendo kwa ajili ya nchi.

Hivyo uwakilishi wa Yanga kwa leo utakuwa mkubwa zaidi na lazima watambue kwamba hakuna utani.

Ushindi utakaopatikana kama ni mkubwa ni bora zaidi pia uwe sehemu ya kuwafanya Al Ahly waingie hofu hata kama Yanga haikucheza na timu kibonde.

Kuwaza mmevuka kabla ya kuingia uwanjani ni kosa na kuna mifano mingi ambayo imewahi kutoa, ninaamini wachezaji wa Yanga watakuwa wanaikumbu. Hivyo wajifunze kupitia mifano hiyo ili kufanya vizuri leo.

KILA LA KHERI YANGA, KILA LA KHERI TANZANIA.