KIBADENI AMTAMBIA LOGA, ASHANTI YAIBUTUA SIMBA

Simba kweli hakuna kitu, leo imepoteza mechi ya sita kati ya 25 ilizocheza kwa kupokea kipigo cha bao 1-0 kutoka kwa Ashanti United.

Ashanti inafundishwa na kocha wa zamani wa Simba, Abdallah Kibadeni ambaye ameiongoza kuitwanga Simba inayonolewa na Zravko Logarusic aliyechukua nafasi yake.

Bao pekee la mchezo huo kwenye Uwanja wa Taifa, Dar es Salaam lilifungwa na Mohammed Nampaka katika dakika ya 17.

Juhudi za Simba kutaka kusawazisha ziligonga mwamba na Ashanti United wangeweza kufunga zaidi kama wangekuwa makini.

Sasa Simba inabaki na pointi 37 katika nafasi ya nne huku Kagera Sugar nayo ikitoka sare ya bila kufungana na Mgambo.

Hivyo kuifanya ifikishe pointi 34 na iwapo Simba itapoteza mechi yake ya mwisho dhidi ya Yanga na Kagera kushinda kwa idadi nzuri ya mabao Simba inaweza kuporomoja hadi nafasi ya tano!