MAKALA: NJIA NYEUPE KWA RONALDO

Na Saleh Ally 

KUTOLEWA kwa Barcelona na PSG katika hatua ya robo fainali ya Ligi ya Mabingwa Ulaya, kumetoa nafasi kwa mshambuliaji wa Real Madrid, Cristiano Ronaldo, kubeba tuzo ya mfungaji bora wa Ligi ya Mabingwa Ulaya, ingawa kuna mitihani kibao kwake.

Ronaldo anaongoza chati ya wafungaji bora wa Ulaya akiwa na mabao 14 wakati Zlatan Ibrahimovic wa PSG mwenye 10 na Lionel Messi wa Barcelona aliyefunga nane, hawatamfukuza tena kwa kuwa timu zao zimetolewa.

Anayeweza kuchuana na Ronaldo ni Diego Costa wa Atletico Madrid mwenye mabao saba au ‘patna’ wake, Gareth Bale mwenye matano. Inaonyesha itakuwa aghalabu sana kwa wawili hao kufunga zaidi ya mabao matano ili kumfikia.

Hivyo ni wakati mwingine kwa Ronaldo kuweka rekodi mpya kwenye ufungaji bora wa Ligi ya Mabingwa lakini pia kufikisha mara tatu kuwa mfungaji bora kwa kuwa, Messi anaongoza kwa kushika nafasi hiyo mara nne.

Messi alikuwa mfungaji bora katika misimu ya 2008-09,  2009-10,  2010-11,  2011-12, wakati Ronaldo akawa mfungaji bora mara tatu katika misimu ya 2007-08, 2012-13. Iwapo Ronaldo atachukua msimu huu, ataungana na wakali wengine waliowahi kuchukua mara tatu ambao ni Ruud van Nisterlooy, Ferenc Puskas, Eusebio na Jean Pierre Papin.

Lakini kuna kitu kingine, kama Ronaldo atafunga bao moja tu, atakuwa mchezaji wa kwanza kushika nafasi ya mfungaji bora wa Ligi ya Mabingwa Ulaya akiwa na zaidi ya mabao 14 ambayo imekuwa idadi ya juu kabisa.

Tokea msimu wa 1955-56, ni Jose Altafin wa AC Milan katika msimu wa 1962-63 na Messi, msimu wa 2011-12 na Ronaldo msimu huu ndiyo wamefanikiwa kufikisha mabao 14. Hivyo akifunga moja, ataweka rekodi mpya.

Kutokana na mambo yanavyokwenda, inaonyesha kuwa katika mechi mbili za mwanzo, Ronaldo ana uwezo angalau wa kufunga bao moja na kuweka rekodi hiyo mpya ya wapachika mabao wa Ligi ya Mabingwa Ulaya.

Lakini kama Madrid itavuka na kusonga mbele hadi fainali, bado Ronaldo atakuwa na nafasi ya kufunga bao moja tena au zaidi, hivyo kuingia kwenye rekodi hiyo ambayo atapita kwa urahisi kwa kuwa wapinzani wake wameishia njiani.

Kwa kuwa anazidiwa na Messi kwa mara ngapi za kuwa mfungaji bora, basi naye angependa kuweka rekodi nyingine tofauti hasa kama hiyo ya ufungaji bora wa mabao mengi zaidi kuliko wengine wote kwa kipindi chote kwa idadi ya mabao.

WAFUNGAJI WANAOONGOZA 2013-2014

MCHEZAJI               MABAO       TIMU       

Cristiano Ronaldo      14   Real Madrid

Zlatan Ibrahimovic    10   PSG 

Lionel Messi                  8    Barcelona

Diego Costa                   7             A. Madrid

Sergio Agüero               6             Man City

Robert Lewandowski        6       Dortmund

Marco Reus                5       Dortmund

Gareth Bale                         5        Real Madrid

WAFUNGAJI BORA KIPINDI CHOTE:

          MCHEZAJI                      MABAO           MECHI   

1       Raul Gonzalez           71              142 

2       Lionel Messi               67               84    

3       Cristiano Ronaldo    64               100

4       Ruud van Nistelrooy         56              73

5       Thierry Henry            50               112

6       Alfredo Di Stefano   49               58    

7       Andriy Shevchenko  48               100 

8       Eusébio                        46               65    

9       Filippo Inzaghi           46               81    

10     Didier Drogba           42               85