AZAM FC KUANZA KUJIFUA KWA MSIMU MPYA JUNI 15

Mabingwa wa soka Tanzania Azam FC wataanza kambi mpya kujiandaa msimu mpya na rasmi wataingia mapema tu, Juni 15.

Azam imefanikiwa kutwaa ubingwa wa ligi kwa mara ya kwanza msimu huu tangu ipande daraja ambapo imekuwa ikitoa ushindani wa hali ya juu katika ligi kiasi cha kuzipiku timu za Simba na Yanga.

Hata hivyo, uongozi wa timu hiyo umefunguka kuwa, usajili wa wachezaji Dider Kavumbagu, Shomari Kapombe na Frank Domayo ndiyo utakaokamilisha usajili wa wachezaji wao msimu ujao.

Katibu Mkuu wa Azam FC, Idrissa Nassoro, amefunguka kuwa timu inatarajiwa kuingia kambini Juni 15, tayari kuanza kwa maandalizi ya msimu ujao wa ligi kuu huku wakiwa wameshakamilisha usajili wote.

“Timu inatarajiwa kuingia kambini Juni 15 mwaka huu kujiandaa na ligi na kocha anatarajiwa kurudi siku chache kabla ya kuanza kambi kwa ajili ya kujiandaa na msimu mpya.

“Kuhusu suala la usajili, tunasajili ili kupata wachezaji watakaotusaidia hapo baadaye na si ilimradi tu kujaza nafasi kwa kusajili wachezaji wasio na viwango,” alisema Nassoro.