BEKI WA SIMBA AIBUKIA NIGERIA

KEITA (WA KWANZA KULIA AKIWA NA KIKOSI CHA SIMBA)

Na Saleh Ally

Beki wa kati wa zamani wa Simba, Komambil Keita ameibukia nchini Nigeria ambako sasa anacheza soka la kulipwa.

Keita ambaye aliondoka Simba baada ya kumalizika kwa msimu wa 2012-13 amesema sasa anakipiga katika kikosi cha Heartland cha Nigeriaakizungumza na Championi Jumatatu kutoka katika jimbo la Imo karibu na mji wa Port Harcourt nchini Nigeria, Keita alisema mazingira ya kazi bora zaidi.

“Ninaishi vizuri na mambo yanakwenda kwa mpangilio zaidi ukilinganisha na ilivyokuwa Simba. Mshahara unalipwa kwa wakati na kila kitu kinakwenda kulingana na mipango.

“Kweli hapa mambo ni mazuri lakini bado ninakumbuka Simba kwa kuwa nina marafiki zangu wakiwemo mashabiki wa timu hiyo ambao walikuwa ni watu wazuri sana,” alisema.

Keita ambaye amejiunga na timu hiyo miezi nane iliyopita anasema amejihakikishia namba na kikosi chao kiliifunga Enyimba katika mechi yao ya mwisho ya ligi.

“Hatuko vizuri sana ila sasa tunaanza kurudi katika kipindi hiki. Ila ligi hapa ni ngumu sana kama utalinganisha na hapo Tanzania. Unajua hapa Nigeria unaweza kucheza mechi leo na kesho ukacheza pia.

“Wachezaji wa hapa wengi wana maumbo makubwa na wana nguvu sana. Hivyo ninalazimika kujifua vizuri ili kuweza kupambana,” alisema Keita.