SIMBA RASMI WAFUTA CHEO CHA RAGE, SASA BOSI KUJULIKANA KAMA RAIS

Hatimaye Msajili wa Vyama vya Michezo ameyapitisha marekebisho ya katiba au rasimu ya katiba ya klabu kongwe ya Simba.

Katika moja ya marekebisho yaliyopitishwa na msajili huyo, cheo cha mwenyekiti kinachoshikiliwa na Ismail Aden Rage kimefutwa na kiongozi wa juu kabisa wa Simba atajulikana kama rais.

Rage anakuwa ndiye mwenyekiti wa mwisho katika historia ya Simba huku akiwa kati ya wenyeviti waliofeli zaidi kutokana na mambo kwenda kombo kupita kiasi kwa misimu miwili sasa ndani ya Simba ambayo iliambuliwa nafasi ya tatu na nne kwa misimu miwili mfululizo.

Rasimu hiyo ya katiba ndiyo ilikuwa inasubiriwa kwa hamu na baada ya zoezi hilo kumamilika na msajili kuipitisha, sasa Kamati ya Uchaguzi ya Simba chini ya Mwenyekiti wake, Damas Daniel Ndumbaro iko tayari kuanza kazi.

Maandalizi ya uchaguzi ya Simba yalikuwa yanasuasua kutokana na rasimu hiyo ya katiba kuchelewa kwa msajili.