HUMUD ATANGAZA KUVUNJA MKATABA WAKE NA SIMBA

Sasa yamemuelemea na kiungo wa Simba, Abdulhalim Humud, ameamua kuchukua uamuzi mgumu wa kusitisha rasmi mkataba wake wa kuendelea kuitumikia klabu hiyo.

Humud alitua Simba msimu uliopita akitokea Azam na kusaini mkataba wa miaka miwili lakini mambo yalimuendea tofauti baada ya kukosa namba kwenye kikosi cha kwanza huku akisugua benchi mara kwa mara na wakati mwingine kutojumuishwa kabisa kwenye kikosi cha wachezaji 18 kwa ajili ya mechi husika.

Pamoja na hayo, Humud amelifungukia mengi Championi Jumatatu kuhusiana na hatua yake hiyo ya kuvunja mkataba huku akiapa kutorudi tena Msimbazi katika maisha yake ya soka yaliyobaki.

“Sikushinikizwa na mtu kufikia hatua yangu hiyo ya kuvunja mkataba na Simba, bali ni maamuzi yangu mwenyewe, sikuwa na wakati mzuri muda wote nilipokuwa Simba tangu awali mpaka niliporudi kusaini mwaka jana.

“Nimeangalia na kuona kwamba sikuwa na thamani Simba ingawa mimi nilikuwa nikiithamini na kuipenda kwa moyo wangu wote, nikagundua kuwa sikupaswa kuichezea Simba kwa kuwa sifaidiki na chochote.

“Sina haja ya kufafanua sana kilichokuwa kinaendelea kuhusu maisha yangu na Simba kwa sababu kila kitu kipo wazi kwamba klabu ilikuwa haihitaji msaada wangu wa uwanjani na mimi shida yangu ni kucheza mpira na si kukaa benchi na kusubiri mshahara tu.

“Nimefanya hivyo si kwa nia mbaya bali nimeangalia mustakabali wa maisha yangu ya soka pia, nimeona kabisa kwamba kama mlolongo huu ukiendelea basi nitaishia pabaya kwenye kipaji changu cha soka, hivyo ni bora nijiengue na kuangalia mambo yangu mengine,” alisema Humud aliyewahi kukipiga Mtibwa na Azam.

“Niliwafuata viongozi na kuwaambia suala hili kama wiki mbili zilizopita, nashukuru kwamba wamenielewa na kunionyesha ushirikiano wa kutosha na juzi Jumamosi wakanikabidhi barua yangu ya kusitisha mkataba wangu wa mwaka mmoja uliobaki.

“Na baada ya hapa si kwamba nitaichukia Simba, hapana bali nitaendelea kuipenda lakini suala la kurudi kuichezea kwa mara nyingine tena hilo halitawezekana katika maisha yangu yote ya soka yaliyobaki,” alisema.