MAKALA: AVEVA, WAMBURA...SIMBA WA KUKODI..!!

Na Saleh Ally

MAMBO ya mpira yana burudani zake, lakini kuna sehemu bila ya kujali ni nani anayehusika, lazima kuwe na suala la umakini mkubwa kuhakikisha mambo yanavyokwenda.

Niwakumbushe, ambao hampendi kuambiwa ukweli poleni lakini wakati maandalizi ya uchaguzi wa Simba yanaanza kuna vitu vimeanza kujitokeza ambavyo vinaonyesha kabisa kuwa hakutakuwa na umakini mbele.

Mambo hayo ndiyo yanayopaswa kukemewa mapema kabisa ili kuhakikisha Simba inapata viongozi sahihi ambao wataikomboa kutoka ilipokwama sasa na kuonekana si Simba tena yenye makali badala yake ni myama mkali anayeweza kuchezewa sharubu na yeyote yule.

Wakati alipokwenda kuchukua fomu mgombea wa kwanza wa urais, Evans Aveva wanachama walijitokeza kwa wingi sana na kusababisha aweke rekodi mpya ya kuwa aliyesindikizwa na mashabiki na wanachama wengi sana huku akifunga baadhi ya mitaa ya Kariakoo jijini Dar es Salaam.

Siku iliyofuata, Michael Wambura naye akaenda kuchukua fomu ya urais pia. Wanachama na mashabiki kibao wakajitokeza kumsindikiza, wakiwa wanacheza na kuimba kama ilivyokuwa kwa Aveva ingawa hakufikia ile rekodi ya watu wengi kama walimsindikiza Aveva siku moja kabla.

Katika siku hizo mbili za kipimo kikubwa cha Simba inaelekea wapi, kuna mambo yamejitokeza ambayo kama yataendelea, basi Simba itadidimia zaidi kuliko hata kipindi cha Ismail Aden Rage ambaye anaondoka na kuiacha ikiwa sawa na timu ya ‘daraja la nne’.

Moja:

Jambo la kwanza ambalo ni dira mbaya kuelekea kwenye uchaguzi ni kuwa na watu wepesi, wanaoweza kununuliwa au walio tayari kuiona Simba inaangamia kwa sababu ya njaa au matumbo yao.

Mfano mzuri ni kikundi cha kina mama pamoja na mashabiki kadhaa ambao walimsindikiza Aveva, siku ya kwanza. Walionekana ni wenye furaha, walicheza kwa juhudi na kukata mauno hadi wakaonekana burudani ya aina yake.

Kwa kuwaangalia kwa mara ya kwanza, wanaonyesha walikuwa wakifurahia ujio wa Aveva na kama ni wanachama maana yake wangempa kura. Lakini ajabu, watu haohao wakaonekana katika tabasamu lilelile, wakicheza kwa juhudi kama siku iliyopita, safari hii wakimpigia debe Wambura!

Sijui kama Aveva na Wambura walilijua hilo au nao waliingizwa mjini na watu hao, lakini hiyo ni dalili mbaya. Viongozi hao wawili ni wanachama wa Simba, hivyo lazima kuwe na chaguo kwa kuwa hakuna mwenye uwezo wa kupiga kura kuchagua watu wawili kushika kiti cha urais. Kura itaharibika.

Sasa hao kina mama na wenzao, vipi leo wanaingia na Aveva kwa mbwembwe, na kesho ngoma na miondoko ileile wanaingia wakiwa na Wambura. Jibu hao ni Simba wa kukodi!

Jiulize, kama kuna Simba wa kukodi, maana yake inawezekana kununua kura? Je, kuna wanachama walio tayari kuchagua yoyote hata kama Simba itadidimia ili mradi wao watapata chao cha kunywa maji ya kunywa kwa siku tatu, nne au tano na klabu hiyo kongwe ikapata mateso kwa miaka minne? Jibu liko wazi, tuwasiliane.

Ila naweza kuweka msisitizo katika hilo, mara kadhaa nimekuwa nikiasa kwamba wanachama ndiyo wamekuwa tatizo kupiga kura kishabiki bila ya kutafakari maneno ya wagombea. Au tamaa zao, halafu mwisho ndiyo wanaolalamika uongozi haufai, vizuri kujitathmini kwa kuwa sasa ndiyo wakati mwafaka.

Pili:

Baada ya Aveva kuchukua fomu akisindikizwa na umati mkubwa, kilichoshuhudiwa siku hiyo ni watu wakiimba na zaidi walizungumza kuwa Aveva ndiye mgombea sahihi na mkombozi.

Siku iliyofuata, mambo yalikuwa tofauti kidogo na idadi kubwa ya mashabiki inawezekana wakiwemo wale waliokuwemo wakati Aveva akienda kuchukua fomu siku iliyopita walikuwa wamebeba mabango yaliyojaa kashfa lukuki kwa watu mbalimbali wa Simba.

Mfano lile lilokuwa likisema Friends of Simba ni wezi, hawana pa kuiba zaidi ya Simba. Mengine yalimnanga Katibu Mkuu wa zamani wa Simba, Kassim Dewji na kadhalika.

Ukiangalia mabango yale kwa kuwa yaliingia na Wambura, maana yake ndiyo mpango wa timu ya uchaguzi ya mgombea huyo ambayo imeamua kwenda na mwendo huo.

Hakika si mwendo sahihi, kwa kuwa ni mwendo unaozidi kuifanya Simba ididimie kwa kuwa kipindi hiki klabu hiyo inatakiwa kumrudisha kundini karibu kila aliyekuwa mbali kutokana na uongozi mbovu uliopita.

Sidhani kama Dewji anastahili kulaumiwa sana kwa kuwa Aveva wala Wambura hakuna aliyewahi kufikia mafanikio yake akiwa Simba. Hadi leo kuna jengo ambalo linaingiza kodi na mamilioni kwa klabu hiyo na baadhi ya viongozi bado wamekuwa wakizila, kumbukeni lilijengwa wakati wa uongozi wake.

Achana na hivyo, kama unazungumzia Friends of Simba, ndilo kundi ambalo kila linapokuwa karibu na timu hiyo linaifanya kuwa bora zaidi na hata wakati inafika fainali ya Caf mwaka 1993, huku ikiing’oa Zamalek na kuivua ubingwa wa Afrika, hao Friends of Simba walikuwa karibu na Simba.

Anavyoingia Wambura maana yake tayari ametengeneza vita na FOS, Dewji na wengine ikiwa na maana hivi, Simba itaendelea kuwa kwenye makundi na migogoro. Rekodi zinaonyesha hakuna timu imewahi kufanya vizuri ikiwa katika kipindi kama hicho.

Waliobeba mabango kama walifanya hivyo kwa sababu ya posho wamuogope Mungu, lakini Wambura kama aliona hiyo ni njia sahihi, namkubusha haiwezi kuwa bora badala yake kwa uwezo alionao anaweza kujenga hoja na kutangaza sera.

Wanasimba wanahitaji sera zaidi, wanataka mtu atakayewaeleza kuwa ana mipango gani, nini tatizo na aalitatua vipi kwa kushirikiana nao. Lakini si kuanza na kuzodoa watu, kutengeneza mapambano dhidi ya mtu na mtu.

Kama ni maendeleo, basi yanapatikana kwa watu kuunganisha nguvu na si kutanguliziana kashfa na dharau, Simba haitabadilika hata ashinde nani. Imani yangu akishinda mmoja kati yao wagombea hao wawili, mmoja atakuwa tayari kumsaidia mwenzake kuisaidia Simba, lakini kwa alivyoanza Wambura, maana yake ni tatizo!