PLUIJM AREJEA ZAKE GHANA, AACHA REKODI YANGA

Aliyekuwa kocha mkuu wa Yanga, Hans van Der Pluijm ambaye ameachana na klabu hiyo baada ya kupata ofa mpya nchini Saud Arabia, juzi Alhamis alifanikiwa kubadili historia ya klabu hiyo iliyodumu kwa zaidi ya miaka 70 na kuandika mpya.

Pluijm alibadili historia huyo baada ya kuwa kocha wa kwanza tangu kuanzishwa kwa klabu hiyo mwaka 1935 aliyeondoka klabuni hapo kwa kufanyiwa sherehe iliyohudhuriwa  baadhi ya viongozi wa klabu hiyo.

Hali hiyo imeifanya Yanga imalize zama zake za kuwatimua makocha wake wa kigeni pamoja na wale wa hapa nyumba ambao walikuwa wakiondoka  klabuni hapo kwa majonzi na masikitiko makubwa huku wakijutia uwamuzi wao wa kukubali kufindusha timu hiyo.

Makocha wengi waliowahi kuifundisha timu hiyo kabla ya Pluijm walikuwa wakitimuliwa na wengine kuondoka hapa nchini kwa kujificha, lakini kwa sasa jambo hilo limekuwa tofauti.

Akizungumza katika hafla hiyo ya kumuaga iliyofanyika makao makuu wa klabu hiyo jijini, Dar Pluijm alisema kuwa anaondoka Yanga ila ataendelea kuikumbuka katika maisha yake yote kutokana na mema mengi waliyomfanyia.

Alisema amieishi Ghana kwa miaka mingi lakini hakuwahi kuonyeshwa upendo wa dhati kama alionyeshwa muda wote aliokaa Yanga, hivyo huko aendako atakuwa barozi mzuri wa klabu hiyo.

“Nitaikumbuka sana Yanga, lakini nawaahidi kuwa nitakuwa barozi mzuri huko niendako na tutashirikiana kwa kila jambo, nawaomba msiwe na wasisiwasi.

“Nitahakikisha nawaletea kocha mzuri ambaye atakuwa na mapenzi ya dhati na klabu hii kama ilivyokuwa kwangu, pia nitawaletea wachezaji wenye kiwango kikubwa cha kucheza soka,” alisema Pluijm ambaye uongozi Yanga umempatia jukumu la kuhakikisha anausaidia kufanya usajili.

Pluijm alijiunga na Yanga mwishoni mwa mwaka jana kwa kusaini mkataba wa miezi sita wa kuifundisha timu hiyo akichukua mikoba iliyoachwa na Mholanzi mwenzake Ernie Brandts, aliyefungashiwa vilago na uongozi wa klabu hiyo baada ya kutoridhishwa na utendaji wake kazi.