UTEUZI KOCHA MKUU ZANZIBAR HEROES UTAFIKIRI FILAMU ISIYO NA STELINGI

Ikiwa zimepita wiki chache tangu Chama cha Soka cha Zanzibar (ZFA) kilipomteua Shaban Ramadhani kuwa Kocha Mkuu wa Zanzibar Heroes, chama hicho kimetengeua uamuzi wake huo na kumpa jukumu hilo, Ahmed Morocco ambaye aliwahi kuwa kocha wa Coastal Union ya Tanga.

Uteuzi wa kocha wa Zanzibar Heroes unaonekana kama filamu kutokana na maamuzi ambayo yanaonekana kama wahusika wanigiza, ambapo sababu za Ramadhani kupokwa cho hicho inadaiwa ni kutokuwa na uhusiano mzuri na mmoja wasaidizi wake ambaop alipangiwa kufanya nao kazi, huku yeye akikataa.

Katibu wa ZFA, Kassim Salum amesema uamuzi huo umefikiwa baada ya kuona kuwa Morocco ndiyo mwalimu pekee anayefaa kukinoa kikosi hicho kwa sasa kutokana na uwezo mkubwa alionao.

“Kwa sasa kocha mkuu ni Morocco, tumezingatia vitu vingi mpaka tukaamua kumpa wadhifa huo, kwanza yeye ndiye mwenye CV nzuri na ya juu kwa makocha wa Zanzibar pia ana uzoefu mkubwa na timu yetu ya taifa,” alisema Salum.

Kwa upande wake, Morocco alisema: “Ni kitu kizuri kuteuliwa kuwa mwalimu wa timu kama hii, nafikiri wameuona uwezo wangu na kujua faida niliyo nayo nikiwa kama kocha, kikubwa ni ushirikiano kwa kweli ili tufikie tunapopataka na sasa nasubiri siku ya kuanza kazi rasmi, nianze majukumu yangu,” alisema Morocco.

Inaelezwa kuwa Ramadhani licha ya kuteuliwa tangu wiki kadhaa zilizopita, hakufanikiwa kuiongoza timu hiyo katika mechi hata moja. Mpaka gazeti hili linaingia mitamboni, hakupatikana kuzungumza kilitokea kwa upande wake.
SOURCE: CHAMPIONI JUMAMOSI