TALAKA YA TRILIONI KADHAA KUTOKA KWA MMILIKI WA AS MONACO

Rybolovlev akiwa na bintiye, Anna.

*Fedha walizotoa Chelsea kumpata Torres, yeye alimnunulia bintiye nyumba

*Akanunua nyumba ya Will Smith na sasa anamiliki kisiwa nchini Ugiriki

MONACO, Ufaransa

MAISHA kila siku yana mambo mapya, kwani mahakama ya nchini Switzerland imemuamuru bilionea wa Kirusi, Dmitry Rybolovlev, 47, kumlipa aliyekuwa mkewe pauni bilioni 2.6 (zaidi ya Sh trilioni 7.2).

Rybolovlev ametakiwa kumlipa Elena Rybolovlev, kiasi hicho ambacho kinaaminika kufikia nusu ya utajiri wake na mahakama imeona itakuwa ni sahihi kwa kuwa wawili hao waliishi kwa miaka 24 kabla ya kutengana baada ya kulumbana kwa kipindi.

 

                                      Helena

Baada ya kutengana mwaka 2008, Elena aliamua kufungua kesi hiyo ambayo imekuwa ikiunguruma bila ya kupata jibu hadi uamuzi huo ulipotolewa.

Rybolovlev ndiye mmiliki wa Klabu ya AS Monaco ya Ufaransa ambaye aliwanunua wachezaji maarufu kama Radamel Falcao akitokea Atletico Madrid na baadaye mshambuliaji wa zamani wa Manchester United, Dimitar Berbatov.

JUMA ANALOMILIKI MAREKANI

Kama Rybolovlev atakubali kutoa kiasi hicho cha fedha, itakuwa ni rekodi ya talaka ghali zaidi kutolewa duniani kutokana na malipo hayo.

Fedha atakayomlipa Rybolovlev inaweza kuinunua klabu yoyote kubwa duniani kwa kuwa hata AS Monaco aliinunua kwa kiasi ambacho hakifikii fedha hiyo.

Talaka zilizokuwa ghali zaidi awali na malipo yake kuonekana ni juu ni ile aliyotoa Alec Wildenstein kwa aliyekuwa mkewe, Jocelyne. Alimlipa pauni milioni 1.5 (zaidi ya Sh bilioni 4). Kabla ya hapo Rupert Murdoch, bilionea wa mambo ya habari, alimlipa aliyekuwa mkewe Anna, kitita cha pauni bilioni moja (Sh trilioni 2.9), hiyo ilikuwa mwaka 1999.

 

ALIMNUNULIA BINTIYE ANNA MJENGO WA PAUNI MILIONI 50, KATIKATI YA JIJI LA NEW YORK

Keshi ya Rybolovlev iliendeshwa kwa kipindi cha miaka sita bila ya mafanikio lakini sasa bilionea huyo aliyepata mafanikio kupitia masuala ya kilimo, analazimika kugawana mali zake na mkewe huyo.

Tayari mkewe huyo amedai kupewa moja ya mali ghali za Rybolovlev kwa kuwa ametaka apewe kisiwa kilicho nchini Ugiriki anachomiliki mumewe, chenye thamani ya pauni milioni 100 (zaidi ya Sh bilioni 278) pamoja na jumba moja la kifahari lililopo nchini Marekani.

 

NYUMBA YA WILL SMITH ALIYOINUNUA KATIKA VISIWA VYA HAWAII

Mwanamama huyo ambaye ana mtoto mmoja aliyezaa na Rybolovlev aitwaye Anna, 13, anaishi nchini Uswiss na ametaka malipo yake yote kufanyika nchini humo huku akisisitiza kubaki na jumba la kifahari analoishi nchini humo.

Utajiri wa Rybolovlev unakadiriwa kufikia pauni bilioni 5.2 (zaidi ya Sh trilioni 14).

Uhamisho wa Torres:

Rybolovlev ni bilionea kweli, pamoja na umiliki wa Klabu ya AS Monaco, lakini mwaka 2012 alinunua nyumba ya pauni milioni 50 (Sh bilioni 139) ambazo ni sawa na uhamisho gumzo wa Fernando Torres kutoka Liverpool kwenda Chelsea na ndiyo ghali kwenye Ligi Kuu England.

Lakini fedha hizo zote alitoa kumnunulia nyumba binti yake Anna ambaye alikuwa amehamia New York, Marekani kwa ajili ya kusoma chuo kikuu. Rybolovlev anamiliki majumba mengine ya kifahari lakini hiyo aliinunua katikati ya mji ili binti yake huyo awahi kufika shule.

 

AKIWA NA FALCAO..

Pamoja na kuimiliki AS Monaco, anamiliki kitita cha pauni milioni 295 katika benki ya Cyprus. Pia ana jumba la ufukweni kule Palm Beach, Florida lenye thamani ya dola milioni 95 ambalo alilinunua kwa milionea mwingine, Donald Trump.

Rybolovlev aliendelea kuonyesha jeuri ya fedha baada ya kutoa pauni milioni 12 na kununua nyumba iliyokuwa inamilikiwa na msanii maarufu wa filamu na muziki wa Marekani, Will Smith.

 

UWANJA WA MONACO, TIMU ANAYOIMILIKI UKIONEKANA KUTOKA ANGANI

Kuonyesha bado fedha ‘inatema’, Rybolovlev akatoa pauni milioni 178 na kununua jumba la kifahari katika eneo la La Belle Epoque mjini Monaco na ndiko amekuwa akiishi.

AS Monaco:

Desemba, 2011, kama utani vile alitangaza kuinunua Klabu ya AS Monaco, lengo lilikuwa ni kuifanya bora ikiwezekana kuizidi PSG ambayo inamilikiwa na bilionea wa Kiarabu kutoka Qatar.

Rybolovlev anamiliki mali kadhaa nchini Ufaransa ambazo zinaelezwa kuzidi pauni milioni 100.

Ujeuri:

Rybolovlev anaaminika ni kati ya watu wajeuri sana, kwani mkewe Elena tangu ametengana naye, amekuwa akifuatiliwa na wapelelezi binafsi usiku na mchana.

Wakati fulani Elena alihojiwa na polisi wa Cyprus kwa madai aliiba pete yenye vito vya madini ya almasi aliyoazima kwa bintiye Anna lakini hakuirudisha. Hata hivyo aliachiwa bila ya kufunguliwa mashtaka.

Jela:

Elena aliwahi kuishi jela miezi 11 akiwa na mumewe kutokana na kashfa ya kudaiwa kumuua mpinzani wake kibiashara.

Hata hivyo, mwisho Rybolovlev alishinda kesi hiyo na wote wakarejea uraiani na kuendelea na maisha ya kawaida.

Lakini Rybolovlev amekuwa akitembea akiwa amevaa koti lisilopitisha risasi akionyesha kuwa anahofia usalama wake. Wakati fulani alilazimika kuihamishia familia yake nchini Switzerland kutokana na kuhofia usalama wake.