WANAUME KUTOKA KUNDI B NA G

Na Saleh Ally

REAL na Atletico Madrid zilivuka katika hatua ya makundi ya Ligi ya Mabingwa zikionyesha zilikuwa na nafasi kubwa ya kutwaa ubingwa wa Ulaya.

Wababe hao wa mji wa Madrid wanakutana leo jijini Lisbon, Ureno katika fainali itakayoamua ipi klabu bora zaidi kisoka barani Ulaya.

Hakuna aliyekuwa akiipa nafasi Atletico Madrid kuwa itafikia fainali, lakini dalili zilianza kuonekana baada ya mechi sita za kundi G.

Atletico dhidi ya Diego Simeone, baada ya mechi 6 za kundi G ilimaliza ikiwa kinara na pointi 16 na ndizo pointi ilizopata Real Madrid ikiwa katika kundi B.

Kingine ambacho kinaonyesha mechi ya leo itakuwa na ushindani mkubwa ni namna takwimu za wakati wa makundi zinavyofanana kwa timu hizo mbili.

Achana na pointi 16, lakini Real Madrid ilishinda mechi 5 kati ya 6, ikatoka sare moja tu na ndicho kimetokea kwa Atletico Madrid katika kundi G.

Ukiachana na kufanana kwa pointi, michezo ya ushindi na sare, kulikuwa na tofauti kwenye mabao ya kufunga na kufungwa na kila upande ukionyesha sifa tofauti.

Real Madrid imefunga mabao mengi zaidi wakati wa hatua ya makundi, ilipachika 20 na Atletico ikafikisha 15, maana yake Madrid ina safu kali ya ushambuliaji.

Lakini kwenye ulinzi, Madrid ikaruhusu mabao 15 na Atletico ikaruhusu 12, hii inaonyesha vijana wa Simeone ni bora kwenye ulinzi zaidi ya wale wa Carlo Ancelott.

Katika kundi B, Madrid ilikuwa na timu za Galatasaray, Juventus na Copenhagen wakati ndani ya Kundi G, Atletico ilipambana na Zenit, FC Porto na Austria Wien.

Kuanzia hatua za makundi kwa takwimu, inaonekana Madrid na watani wao wa jadi Atletico ni timu zisizopishana viwango kwa kiasi kikubwa.

Hii ni sehemu ya kuonyesha fainali hiyo ni ngumu na haina mwenyewe, maana yake timu yoyote inaweza kuwa bingwa leo.

Timu nyingine kutoka katika makundi ambazo zilipiga hatua kubwa ni kutoka kundi D na H.

Barcelona iliingia nusu fainali ikitokea kundi H na Bayern ndiyo walikuwa vinara wa kundi D.

Lakini mwisho, Barcelona wakakiona cha moto kutoka kwa Atletico na mabingwa watetezi, Bayern, wakavuliwa kombe kwa aibu dhidi ya Madrid.

Makocha wote wawili wamewahi kutwaa Kombe la Ligi ya Mabingwa Ulaya wakiwa wachezaji, Ancelott na AC Milan na Simeone na Inter Milan, zote za Italia.

Lakini Ancelott akalichukua akiwa na AC Milan, sasa huenda ikawa ni zamu ya Simeone ambaye akifanya hivyo, atavunja ndoto ya Madrid kutwaa Kombe la 10 la Ligi ya Mabingwa.

 

		P	W	D	L	GF	GA	GD	Pts
1	Real Madrid	6	5	1	0	20	5	15	16
2	Galatasaray	6	2	1	3	8	14	-6	7
3	Juventus	6	1	3	2	9	9	0	6
4	FC Copenhagen	6	1	1	4	4	13	-9	4

		P	W	D	L	GF	GA	GD	Pts
1	Atletico Madrid	6	5	1	0	15	3	12	16
2	Zenit	6	1	3	2	5	9	-4	6
3	FC Porto	6	1	2	3	4	7	-3	5
4	Austria Wien	6	1	2	3	5	10	-5	5