MAKALA: MSIMNAYANYASE MKE WA MZEE SMALL….NAFIKISHA

MAREHEMU MZEE SMALL, MAMA SAID NA SALEH ALLY

Na Saleh Ally

TAKRIBANI miezi sita kulizagaa taarifa kuhusiana na kifo cha msanii maarufu wa maigizo na vichekesho, Said Ngamba maarufu kama Mzee Small.

Lakini sasa hatuko naye baada ya kufikikwa na mauti juzi saa 4 usiku alipokuwa amelezwa katika hospitali ya Taifa ya Muhimbili jijini Dar es Salaam.

SALEH ALLY AKIWA NA MAREHEMU MZEE SMALL WAKATI WA UHAI WAKE

Nakumbuka siku hiyo ilikuwa takribani saa 6 usiku, nikaamua kufanya juhudi za kutaka kuhakikisha pamoja na kwamba taarifa hizo zilikuwa zimezagaa katika mitandao ya kijamii pamoja na blogu mbalimbali.

Nilihofia kuzungumza na mkewe, nilimtafuta mmoja wa wanaye ambaye alinieleza kushangazwa na taarifa hizo lakini mzee wake alikuwa hai ingawa alikuwa mgonjwa.

Kwa kuwa nilihakikishiwa kuhusiana na hali yake, sikuwa na hofu tena ya kupiga simu yake, nilipopiga simu ya Mzee Small alipokea mkewe, nimezoea kumuita mama Said.

Mama Said alinilieleza kuwa mumewe kweli ni mgonjwa lakini hakuwa na hali mbaya na walikuwa wote wamelala. Kwa kuwa nimezoena na mke wa Mzee Small, nilimuambia siamini hadi nitakapozungumza naye.

Nilimsikia anamuamsha, mwisho Mzee Small alichukua simu na kuanza kuzungumza na mimi. Lakini kilichotokea, hakunikumbuka, alionekana wazi amenisahau, nilishangaa, nikaumia lakini nikawaza haiwezi kuwa kawaida, lazima atakuwa anaumwa.

Siku iliyofuata, niliondoka ofisini nikiwa nimeongozana na timu ya vijana wa Championi kwenda kupatafuta nyumbani kwa Mzee Small eneo la Tabata, pamoja na urafiki wangu na mzee huyo kwa takribani miaka 12, sikuwa nimewahi kufika nyumbani kwake.

Nilianza kufahamiana naye wakati nikiwa Habari Corporation, baadaye nikahamia Mwananchi na alikuwa na kawaida ya kupita ofisini pale Tabata Relini na kunisalimia.

Siku hiyo, tulijitahidi hadi tukafanikiwa kufika nyumbani kwake. Lakini tuliambiwa alikwenda hospitali ambako amekuwa akifanyishwa mazoezi baada ya kupata nafuu kubwa kutokana na mwili wake kupooza upande mmoja, nakumbuka wa kulia.

Hivyo mimi, wenzangu kutoka Championi tuliendelea kumsubiri na mara ya kwanza namuona tena Mzee Small, alifika akiwa kwenye pikipiki, nakumbuka alikuwa amevaa jezi ya zamani ya timu ya taifa, Taifa Stars.

Majirani walimpokea kama mbunge, wakamsaidia kuteremka kwenye pikipiki naye akaanza kuwatania akiwaita ni wachumba zake. Mwisho aliinua uso na kuniona, alishituka sana.

Hisia za urafiki wetu zilikuwa kwenye macho yake, alionyesha kushangazwa na kuniona pale na wala hakuwa akikumbuka kama tulizungumza usiku wa kuamkia siku hiyo lakini akanieleza alitaka kunyoa ndevu kwanza, halafu baada ya hapo ndiyo tungezungumza.

Nilimsubiri kwa takribani dakika 20, ananyolewa huku akinipa stori na baada ya hapo, akaniomba tuongozane kwenda nyumbani kwake ambako alitununulia wote soda na baada ya hapo stori kuhusiana na kuzushiwa kifo zikaanza.

Katika mengi tuliyozungumza huku akimsisitiza mkewe kuwa mimi ni kati ya wanaye, Mzee Small aliniambia maneno hayo: “Siku itafika, najua lazima nitakufa kwa kuwa mimi ni mwanadamu, siwezi kukwepa.”

“Lakini kama nitatangulia, basi andika, waambie ndugu zangu wasimtese mke wangu kwa kuwa huyu ndiye ndugu yangu namba moja na amepigana sana kunisaidia. Utaona usiku, mchana na kila siku niko naye.

“Mimi nina nyumba hii na kuna nyingine ambayo anaishi mwanangu, sasa sitaki kusikia wanamyanyasa huyu mama kwa kuwa naye amekuwa akijitolea katika ujenzi. Nasema hizi ni nyumba zangu na mke wangu.

“Usije ukasema Mzee Small amechanganyikiwa, nasema kwa kuwa najua. Kuna baadhi ya ndugu zangu sasa hawazungumzi na mke wangu, wanasema eti ameniroga mimi, hiki ni kichekesho. Lakini bado siwaoni kunisaidia, hivyo nikifa uwaambie, yule mzee wangu alisema msimnyanyase mke wake.”

Hiyo ilikuwa ni mara ya mwisho mimi kumuona tena Mzee Small, lakini tulikuwa tukiendelea kuwasiliana kwa simu mara kadhaa nikitaka kumjulia hali na wakati mwingine yeye ndiye alinipigia na kutaka kujua ninaendeleaje.

Juzi saa moja usiku, Mama Said alinipigia simu na kuniambia: “Baba yako ni mgonjwa, amezidiwa sana, sasa niko kwenda daladala narudi nyumbani, nimemuacha Muhimbili lakini amekata kauli na anakoroma tu.”

Siko Dar es Salaam, nisingeweza kwenda hospitali, lakini nilishituka na kupata hisia mbaya, lakini nikamuachia Mwenye Mungu kwa kuwa najua ni mwingi wa rehema na mwenye kurehemu.

Asubuhi ya jana nilipata taarifa za kifo cha Mzee Small ambaye alifariki saa 4 usiku, saa tatu tu baada ya mimi kuwa nimewasiliana na mkewe Mama Said ambaye alipambana katika shida zote za mzee wetu.

Kila kitu majaaliwa, sitamzika Mzee Small ambaye anayezikwa leo saa 10 kama nilivyotaarifiwa. Najua haya pia ni majaaliwa, ila ninaumia lakini sina  uwezo wa kutengua uamuzi wa Mwenyezi Mungu.

Mzee Small aliniahidi, pindi atakapopata nafuu tu, basi atafunga safari na kunitembelea katika ofisi za Championi ndani ya Global Publishers kama alivyokuwa akifanya nilipokuwa nikilisukuma Mwanaspoti ndani ya Mwananchi. Lakini hajakuweza, bado naamini, yote ni majaaliwa.

Ninaamini nimefikisha ujumbe wake alionipa kuwaeleza ndugu na jamii. Pole zangu kwa familia na mashabiki wake, lakini niwakumbushe, machozi hayatatosha kumuenzi Mzee Small, alichokifanya kwenye kazi zake ndiyo kienziwe.