WACHEZAJI KUTOKA GHANA WAMUOMBA LOGARUSIC WAKIPIGE SIMBA

Wachezaji wanne kutoka nchini Ghana wanataka kuja nchini kuichezea Simba katika msimu ujao wa Ligi Kuu Bara.

Wachezaji hao, washambuliaji wawili, beki na kiungo mmoja wako tayari kuichezea Simba na wamefanya mawasiliano na Kocha Zdravko Logarusic.

Akizungumza kutoka kwao Croatia, Loga ameliambia Championi Jumatatu kuwa Waghana hao wako tayari lakini amewataka wavute subira.

“Wanataka kuja kweli kama ulivyoambiwa, karibu wote nimefanya nao kazi katika timu za Ghana pia ni wachezaji wazuri.

“Lakini siwezi kukurupuka na kuwaita tu, kwanza ni kuangalia mahitaji ya timu, baada ya hapo ninaweza kujua cha kufanya.

“Na hata kama nitafikia kuwa niwaruhusu waje, lazima nijue maendeleo yao, rekodi zao kwa kipindi hiki. Ndiyo maana nilisema sikuwahi kupendekeza mchezaji yoyote kutoka Kenya.

“Nasisitiza suala la wachezaji wan je ya Tanzania bado, ila wako hao na wengine wanataka kuja, ikifikia, basi nitaifanya kazi hiyo. Sasa bado nasubiri uchaguzi wa Simba,” alisema Loga.

Simba iko katika mchakato wa uchaguzi mkuu uliopangwa kufanyika Juni 29, hali iliyosababisha zoezi la usajili kusuasua.

%%%%%

Yanga yampa Maximo wachezaji 60

Na Mwandishi Wetu

KOCHA anayetarajiwa kujiunga na Yanga kama mambo yatakwenda vizuri, atapewa takribani wachezaji 60 wawe chini ya himaya yake.

Uongozi wa Yanga kupitia kamati yake ya mashindano umechukua uamuzi wa kumkabidhi Maximo timu kubwa pamoja na ile ya vijana chini ya miaka 20.

Uamuzi huo unatokana na historia ya Maximo ambaye alikuza vijana wengi wakati akiwa kocha wa timu ya taifa, Taifa Stars.

“Ukiangalia Maximo ndiye alikuwa na uwezo mkubwa wa kuona kijana ambaye atakuja kuwa mchezaji bora hapo baadaye. Angalia Jerry Tegete, pia Kiggi Makasi na wengine.

“Hivyo kama tutamkabidhi timu hizo mbili, maana yake atakuwa na uwezo wa kujua vijana wanaofanya vizuri na atawapandisha kwenye timu kubwa.

“Au anaweza kuwa anapendekeza vijana kutoka timu mbalimbali, wanajiunga na timu ya vijana ya Yanga halafu baadaye wanapandishwa kwenye timu kubwa,” kilieleza chanzo.

Mazungumzo ya kuhakikisha Maximo anatua nchini au la, yamefikia asilimia 95 na kocha huyo ameonekana yuko tayari kutoka kwao Brazil na kuja kuanza kazi ya kuinoa Yanga kwa kuchukua nafasi ya Hans van der Pluijm.

Championi ilikuwa gazeti la kwanza kuandika kuhusiana na ujio wa Maximo baada ya Yanga kuanza kufanya naye mazungumzo na wakati huo yalikuwa yamefikia asilimia 90, sasa yamepanga hadi 95 na huenda katua nchini ndani ya siku chache zijazo.

Kazimoto, Tegete, Henry wajichimbia Mwanza

Na Mwandishi Wetu, Mwanza

WACHEZAJI nyota kutoka katika timu mbalimbali wamerejea mapumzikoni jiji hili maarufu kwa kuzalisha wachezaji nyota.

Mshambuliaji wa Yanga, Jerry Tegete, kiungo wa Simba, Henry Joseph na kiungo wa Al Markhiya ya Qatar, Mwinyi Kazimoto ni kati ya wachezaji walio mapumzikoni jijini hapa.

Wote watatu walichipukia kisoka mkoani hapa kabla ya kufunga safari na kwenda mikoa ya Pwani na Dar es Salaam kusaka maisha zaidi.

Wachezaji hao wamekuwa wakionekana katika mitaa mbalimbali wakiwa na marafiki na ndugu zao wakiendelea kujivinjali.

Taarifa zinasema huenda Mrisho Ngassa na Kelvin Yondani, wanaweza kuwasili hapa leo na kuondoka kesho ili kuiwahi kambi ya timu ya taifa.

Mwanza, Kigoma na Mbeya ndiyo mikoa inayoongoza kwa kutoa wachezaji wengi nyota katika soka nchini.