MBEYA CITY WAYAPUUZA MAMILIONI YA YANGA, SIMBA

Uongozi wa timu ya Mbeya City ya jijini Mbeya, umefunguka kuwa haupo tayari kuuza mchezaji wao yeyote kwa dau lolote watakaloahidiwa na timu kubwa za Simba, Yanga na Azam.

Timu mbalimbali zimekuwa zikiwanyemelea wachezaji wa Mbeya City kufuatia uwezo waliouonyesha kwenye ligi msimu uliopita.

Wachezaji ambao wametajwa kuwa wanaweza kusajiliwa na timu hizo ni Saad Kipanga, Paulo Nonga, Hassan Mwasapili.

Katibu wa Mbeya City, Emmanuel Kimbe, alisema  kwa upande wao fedha sio tatizo la kuwaruhusu wachezaji wao kusajiliwa na timu nyingine na badala yake wanachokihitaji wao ni kuona wachezaji wao wanabakia klabuni hapo msimu ujao.

“Hatuna mpango wa kuwaruhusu wachezaji wetu kwenda kokote hata kama klabu itakuja na dau la kiasi gani, hatuwezi kuwaruhusu wachezaji wetu kuondoka.

“Fedha siyo msingi, msingi kwetu ni wachezaji kwani hatupo tayari kupokea kiasi chochote cha fedha, tunachohitaji ni kubaki na wachezaji wetu tu.

“Kuhusu kambi tunatarajia kuingia mwanzoni mwa mwezi Julai kwani kwa sasa wachezaji wamepumzika kutokana na michuano ya Nile Basin waliyotoka kushiriki nchini Sudan,” alisema Kimbe.