WANACHAMA SIMBA WAANDAMANA KISA MALINZI

Wanachama wa Simba juzi walifanya maandamano ya kupinga maamuzi ya Rais wa Shirikisho la Soka Tanzania (TFF), Jamal Malinzi, kusimamisha Uchaguzi Mkuu wa Simba lakini walifika mbali zaidi kwa kutamka kuwa rais huyo ni mwanachama wa Yanga na anataka kuharibu mipango yao.

Wanachama hao walifanya maandamano yao hayo kwenye makao makuu ya timu hiyo, Kariakoo Msimbazi, Dar, wakiwa na kadi zao mkononi huku wakizungumza hili na lile lakini kubwa ni kupinga maamuzi ya kiongozi huyo.

Wanachama hao walisikika kwa pamoja wakiimba wa hisia kwamba: “Huyo Malinzi kumbe Yanga, huyo Malinzi kumbe Yanga… Tunataka uchaguzi, tunataka uchaguzi.”

Hata hivyo, mmoja wa wanachama anayetoka Tawi la Mpira Pesa, Ras Simba, alitoa kauli ya kujitolea kutaka kumpa semina rais huyo ya uongozi wa soka kwani anavyofanya sasa ni tofauti kabisa na misingi ya uongozi.

“Nafikiri huyu bwana soka limemshinda na hana misingi ya uendeshwaji wa mpira, mimi naelewa zaidi masuala ya soka, nampa nafasi ya bure aje kwangu nimfundishe jinsi soka linayotakiwa kwenda.

“Haya mambo anaweza akachukulia ni ya kawaida lakini anatakiwa kutambua kuwa soka linagusa hisia za ndani za watu wengi kwa hiyo anatakiwa arekebishe maamuzi yake mapema,” alisema mwanachama huyo mwenye kadi namba 05757.