RAGE AWATUPIA NENO WALIOKWENDA MAHAKAMANI, WAMBURA ACHARUKA AKATA SIMU

RAGE

Mwenyekiti wa Simba anayemaliza muda wake, Ismail Aden Rage, amefunguka na kutoa tamko kali kwa wanachama wa klabu hiyo waliofungua kesi katika Mahakama Kuu Kanda ya Dar es Salaam, wakiomba kusimamishwa kwa Uchaguzi Mkuu unaotarajiwa kufanyika mwishoni mwa wiki hii.

Juzi Jumatatu, zaidi ya wanachama 60 wanaosadikiwa kuwa wafuasi wa mgombea urais aliyeenguliwa Michael Wambura, walifungua kesi namba 291 chini ya Wakili Revocatus Kuuli, kwa kile wanachodai kuwa uchaguzi huo unafanyika kinyume cha sheria na haki.

WAMBURA

Kitendo hicho, kimemfanya mwenyekiti Rage kutoa tamko, ambapo amewataka wanachama hao kufuta kesi hiyo mara moja kwani kinyume na hapo ni kuihatarisha klabu kwa ujumla.

Akizungumza na Championi Jumatano, bosi huyo ambaye pia ni Mbunge wa Tabora Mjini, aliwataka wanachama hao kupeleka malalamiko yao katika Shirikisho la Soka Tanzania (TFF) au mashirikisho ya juu lakini si mahakamani.

“Nimesikia hilo, lakini chondechonde ninawaomba wanachama hao kama kweli wana mapenzi na Simba kufuta kesi hiyo mara moja, kinyume cha hapo ni kuiweka pabaya timu.

“Sheria za soka ziko wazi na wanajua kuwa ni hatari masuala ya soka kupelekwa mahakamani. Niwaombe tu wafute kesi yao mapema na kama wanaona haki haijatendeka, basi wapeleke malalamiko yao TFF au Caf, lakini si mahakamani,” alisema Rage.

Wakati huohuo Wambura alipoulizwa kama anahusika alisema: “Masuala ya wanachama mimi hayanihusu, waulize wenyewe. Mimi sihusiki kwa lolote na tena mtu asiniulize lolote, waulize wao,”alisema na kukata simu.

SOURCE; CHAMPIONI