SIMBA YAANZA MAZUNGUMZO NA MKENYA, MGANDA

HANS POPPE

Mwenyekiti wa Kamati ya Usajili ya Simba, Zakaria Hans Poppe, ameeleza kuwa wanatarajia kuwasajili wachezaji wa kimataifa raia wa Kenya na Uganda ambao watatua hapa nchini keshokutwa Ijumaa.

Hadi sasa Simba imeshafanikiwa kunasa saini za wachezaji wawili kwa ajili ya msimu ujao wa Ligi Kuu Tanzania Bara, ambao ni Joram Nassoro aliyetokea Lipuli na Mohamed Hussein ‘Tshabalala’ aliyekuwa Kagera Sugar.

Hans Poppe amefunguka kuwa, wanahitaji kufanya usajili makini kwa ajili ya msimu ujao wa ligi kuu kwa kuanza na usajili wa ndani kwa kuziba mapengo yaliyojitokeza ili waweze kuwa na kikosi bora msimu ujao.

“Tunahitaji kuboresha kikosi, tayari tumeshasajili wachezaji wawili na leo tunatarajia kuwasajili wengine wawili kwani mkakati wetu ni kupata wachezaji bora.

“Tunatarajia kuwasajili wachezaji wawili wa kigeni, mmoja anatokea Kenya na mwingine Uganda na wanatarajiwa kutua nchini siku ya Ijumaa tayari kwa kuingia nao mkataba mpya ili waweze kusaidiana na wachezaji waliobakia.

“Tunaanza na kuwasajili wachezaji wa ndani, kisha tunasajili wachezaji wa nje na mchakato wa kusaka wachezaji zaidi unaendelea,” alisema Hans Poppe.

Tayari Simba imeachana na beki wa kati, Mrundi, Gilbert Kaze huku Joseph Owino akidai hataweza kurudi kwa kuwa amepata timu nyingine.