AMISSI TAMBWE AFIWA NA SHANGAZI YAKE

Mshambuliaji wa Simba, Amissi Tambwe, ameshindwa kuhudhuria mazoezi ya timu hiyo wikiendi iliyopita kufuatia kufiwa na shangazi yake aliyefia nchini Rwanda usiku wa kuamkia Jumamosi.

Simba juzi ilifanya mazoezi ya stamina katika ufukwe wa Coco jijini Dar es Salaam bila ya kocha Mcroatia, Zdravko Logarusic ambaye bado yupo katika mazungumzo ya kusaini mkataba.

Kocha Msaidizi wa Simba, Selemani Matola ambaye pia ni mchambuzi maarufu wa soka katika gazeti la Championi, alisema Tambwe ameshindwa kutua mazoezini hapo kufuatia kupata taarifa za msiba wa shangazi yake ambapo anatarajia kuondoka kwenda kuzika.

“Kuna wachezaji kadhaa hawajaja kufanya mazoezi kufuatia matatizo mbalimbali ya kifamilia, Tambwe amepata msiba wa kufiwa na shangazi yake aliyekuwa akiishi Rwanda ambapo haijajulikana atazikiwa wapi.

“Iwapo wataamua kuzika Burundi basi na yeye atakwenda kuzika na kwa sasa anafanya utaratibu wa kujua mazishi yatafanyika wapi na iwapo itakuwa Rwanda basi hatakwenda,” alisema Matola.

Alipotafutwa Tambwe kuzungumzia suala hilo, alieleza kuwa bado hajafanya maamuzi ya nini cha kufanya hadi hapo atakapoamua.