RUVU WAFURAHIA MECHI YA KIRAFIKI DHIDI YA AZAM

MASAU BWIRE

Uongozi wa Ruvu Shooting ya mkoani Pwani, umesema kuwa mchezo wao ujao wa kirafiki wanaotarajia kucheza Alhamisi katika Uwanja wa Chamazi dhidi ya Azam utakuwa ni kipimo tosha kwa timu yao.

Ruvu ambayo imeamua kutovunja kambi yao kama zilivyofanya baadhi ya klabu baada ya tarehe ya kuanza Ligi Kuu Bara kusogezwa mbele, imedhamiria kutafuta michezo mingi ya kirafiki ili kukiweka imara kikosi chao kwa ajili ya mikikimikiki ya ligi hiyo.

Ofisa habari wa klabu hiyo, Masau Bwire, alisema kutokana na Azam kuwa mabingwa watetezi, ndiyo maana wameamua kuomba kucheza nao mapema.

“Azam ni mabingwa watetezi wa Ligi Kuu Bara na sisi tumeamua kucheza nao mapema ili waweze kukipima kikosi chetu ambacho baada ya kufanya mazoezi ya kutosha, tumeona kimeshakuwa tayari kwa michezo ya Ligi Kuu Bara.

“Tumedhamiria kupata mechi mbili katika kila wiki mpaka itakapofika wiki moja kabla ya siku ya kuanza ligi kuu ambapo hapo awali ilikuwa ni Agosti 24 lakini TFF wakaamua kuipeleka hadi Septemba 20,” alisema Bwire.

Mpaka sasa Ruvu Shooting wameshacheza mchezo mmoja dhidi ya African Lyona katika Uwanja wa Mabatini, Pwani na kuibuka na ushindi wa mabao 4-0 huku kocha mkuu wa klabu hiyo, Tom Olaba akikisifia kikosi chake kutokana na soka safi kilicholionyesha siku hiyo.