HOJA YANGU: KAMATI ZA USAJILI SIMBA, YANGA SAWA, ILA WATAALAMU LAZIMA

UONGOZI wa Simba chini ya rais wao mpya, Evans Aveva, wametangaza kamati yao ya usajili ambayo itahakikisha inamalizia kwa uhakika zoezi la usajili.

Kamati ya usajili ya Simba ina watu wazito, mfano hawa wanne ambao ni wakongwe katika Kundi la Friends of Simba (FOS) kama Kassim Dewji, Crescentius Magori, Musley Al Rawah, Zacharia Hans Pope, pia kuna Rodney Chiduo na Said Tully.

Ukiangalia watu hao, hakuna ubishi watakuwa makini kwa kuwa wamekuwa mara nyingi kwenye kamati za usajili au zile zinazohusisha masuala ya wachezaji au mashindano mbalimbali. Lakini ni watu ambao wako tayari kupoteza muda na hata fedha zao ili kufanikisha malengo ya wanachokitaka kwa ajili ya usajili bora wa kikosi chao, hilo ni jambo bora kabisa.

Kwa upande wa Yanga, wao wamekuwa wakitumia zaidi kamati ya mashindano ambayo pia hufanya kazi ya usajili wa wachezaji ambao baadaye huitumikia Yanga kwa lengo la kuhakikisha inashinda mechi zake na kupata mafanikio.

Kamati hiyo inajulikana katika usajili wake, imefanikiwa kuwapata wachezaji kadhaa nyota ambao walikuwa wanawaniwa na timu nyingine kama Azam FC au Simba.

Ushindani wa usajili wa wachezaji kutoka timu mmoja kwenda nyingine unazidi kuwa mkubwa upande wa klabu hizo kongwe na ili ziendane na wakati lazima mambo ya kitaalamu yapewe nafasi.

Ninapozungumzia utaalamu, sizungumzii ulee ambao unapewa jina la kamati ya ufundi. Nazungumzia taalum ya soka ambayo watu watakuwa wameingia darasani ya kuisomea.

Kamati hizo mara chache zimekuwa zikipata nafasi ya kuwauliza makocha wanachotaka. Lakini mara kadhaa zimekuwa zikikiuka ripoti za makocha na kufanya usajili kulingana na zinavyoamini.

Yote yanawezekana lakini kufanya mambo yaende kitaalamu zaidi, lazima kuwe na mmoja wa wajumbe ambaye ana taalum ya ukocha na ingekuwa vizuri zaidi Yanga na Simba zikaanzisha utaratibu wa kuwa na makocha wasaidizi ndani ya kamati hizo.

Kocha msaidizi atakuwa na nafasi ya kuwa daraja kwa kuwa atafanya mawasiliano na bosi wake ambaye ni kocha mkuu na pia atafanya hivyo kwa wajumbe wa kamati ya usajili.

Pia kocha huyo msaidizi atakuwa na nafasi nzuri ya kutoa ushauri wa kiufundi ndani ya kamati hiyo.

Mapendekezo yanaweza kuwa yake kwa mujibu anavyoiona yeye lakini pia baada ya kuwa amekaa na kocha mkuu na kujadiliana naye.

Maana yake atakachokuwa akikiwasilisha kinaweza kuwa kile ambacho amekubaliana na bosi wake ambaye ni kocha mkuu. Hali hii itasaidia mambo mengi sana na taratibu itarudisha mambo kwenye mstari.

Kwa kocha ni rahisi kujua sifa nyingi zaidi za mchezaji, mfano faida zake anapokuwa anatumia miguu yote. Wepesi au uzito wake, kiwango cha upigaji mashuti, vichwa na mambo mengine.

Lakini bado kocha ana uwezo wa kujua kuhusiana na mchezaji ambaye sasa anaonekana hayuko katika kiwango kizuri, bado akasajiliwa kwa ajili ya kumboresha na kuamini atakuwa bora zaidi, yote hayo yanawezekana.

Kwa kifupi, kamati hizo za usajili zinaweza kufanya mambo yake kwa mpangilio wa juu zaidi kama zitakuwa na watalaamu ambao watasaidia mambo kwenda kitaalamu kuliko kwa uzoefu pekee.

Dewji, Magori, Musley ni kati ya wale walioanza kazi hiyo kitambo, utaona walishiriki katika zile enzi cha kikosi cha Simba kilichokuwa kinasumbua mfano mwaka 2003.

Lakini sasa ni kipindi cha utaalamu zaidi, pamoja na kwamba wanajua, lakini ushauri wa kitaalamu unaweza kuwasaidia wakiwa ndani ya vikao vyao na watatimiza vyema malengo yao. Hata kama wanapata mawazo ya makocha, basi vikao vyao bado vinawahitaji hao makocha.