MSUMBUJI WALIKUWA WANAWEZEKANA, HATA HUVYO TAIFA STARS KUNA KITU CHA KUFANYA

VIZURI sana kama hakutakuwa na sababu ya kuanza kwa lawama kwa wachezaji wa timu ya soka ya taifa, Taifa Stars ambao jana walipambana vilivyo kutaka kuvunja ‘utaratibu’, kuwa Msumbiji ni wagumu kwetu.

Mechi ya jana ilikuwa ni kuwania kucheza Kombe la Mataifa Afrika, michuano itakayofanyika mwakani.

Mechi imemalizika kwa mabao 2-2 huku wageni wakisawazisha katika dakika za mwisho kabisa baada ya Isaac Calvaho kufunga bao la kusawazisha kutokana na pasi nzuri ya Elias Pelembe ‘Domingues’.

Kuwalaumu kwa sasa kwa kuwa tunaamini Taifa Stars bado wana kazi mbele yao haitakuwa sahihi, badala yake ni kuwapa moyo lakini ni kuwaeleza ukweli kwamba kuna sehemu fulani walikosea.

Katika mechi ya jana, Stars waliianza vibaya, wao ndiyo walionekana ni kama wageni na muda mwingi waliwapa nafasi 

Msumbuji kuuchezea mpira na hawakuwa na presha kubwa.

Moja ya sifa kubwa ya Msumbiji ni kucheza vizuri, pasi za uhakika na staili yao ni ya KIreno. Kuwanyima raha ni lazima kuwazuia kucheza mpira waliouzoea, lakini jana haikuwa hivyo.

Kidogo imeishangaza kuona Stars ikishindwa kuwabana Msumbuji kwa staili yao ya uchezaji kwa kuwa Kocha Mart Nooij anajua kuhusiana nao kwa kuwa alikuwa kocha wao, labda aseme maelekezo yake hayakufuatwa.

Kitu kingine, Stars hawakuwa na nguvu ya kutosha katika kiungo na ilionekana muunganiko wa Erast Nyoni na Mwingi Kazimoto kutokuwa na nguvu ya kutosha, hivyo kuwapa nafasi ‘Wamakonde’ hao kucheza.

Suala la kutokuwa na mkakati madhubuti wa kumdhibiti Elias Pelembe maarufu kama Domingues, pia ni jambo ambalo limeiangusha Taifa Stars. Kwa kuwa rekodi yake inajulikana kuanzia kwa Nadir Haroub ‘Cannavaro’ hadi Kocha Nooj.

Domingues ni mmoja wa wachezaji wenye vipaji vya hali ya juu katika ukanda wa chini ya Jangwa la Sahara. Sasa anakipiga Mamelodi Sundowns ya Afrika Kusini, ni msumbufu na anajua cha kufanya.

Katika mechi ya jana, alifunga bao la kwanza kwa mkwaju wa penalti baada ya ndugu yake kufanyiwa madhambi halafu akatoa pasi ya bao la pili. Hii inaonyesha kiasi gani ni hatari kwa Stars.

Ndiye aliyechangia kwa kiasi kikubwa Taifa Stars kung’olewa kwa mikwaju ya penalti, mara ya mwisho ilipocheza mjini Maputo baada ya mechi kumalizika kwa sare ya mabao 1-1 jijini Dar na baadaye jijini humo.

Domingues alikuwa msumbufu, tatizo kubwa kwa ngome ya Stars. Lakini katika mechi ya jana, hakukuonekana kama kulipangwa njia ya kumdhibiti mkali huyo wa Msumbiji anayevaa namba saba mgongoni.

Mechi ilikuwa ngumu na huenda bado ninaweza kupeleka malalamiko yangu kwa Shirikisho la Soka Tanzania (TFF), kwamba kuamua kuweka kiingilio kikubwa huku likijua mechi itaonyeshwa kwenye runinga, limechangia kukosekana kwa watu wengi wa kuishangilia Stars kwa nguvu.

Vizuri sasa TFF ya Malinzi ikaangalia umuhimu wa kupata watu wengi uwanjani Stars inapokuwa inacheza, kuliko kutaka kupata fedha nyingi tena kwa mipango duni. Ninaamini hata fedha zilizopatikana katika mechi hiyo zitakuwa chache sana, yote hiyo ni mipango duni.

Stars wana nafasi ya kujipanga, ikiwezekana kambi ibaki Dar es Salaam ili wajiandae vilivyo kwa ajili ya mechi ya pili na hakuna sababu ya kukata tamaa kwa kuwa wakipambana vilivyo wana kila sababu ya kusonga mbele.

Vizuri kurekebisha makosa kadhaa, wachezaji waliocheza chini ya kiwango kama Mrisho Ngassa, Kelvin Yondani na wengine, waamini ilikuwa siku mbaya na wanaweza kufanya vizuri zaidi kwa kuwa kuna kitu muhimu cha kufanya.

Lakini waliofanya vizuri jana kama Mbwana Samatta, Thomas Ulimwengu, Nadir Haroub ‘Cannavaro’, Hamis Mcha na wengine, waamini wanaweza kufanya vizuri zaidi na siku ikifika, wakaipiganie nchi yetu.